Germanııada jolaýshylar poıyzy júk kóligimen soqtyǵysty, zardap shekkender bar
ASTANA. KAZINFORM — Germanııanyń ońtústigindegi Reınland-Pfalts shtatynda aımaqtyq poıyz júk kóligimen soqtyǵysty. Júrgizýshi aýyr jaraqat alyp, poıyz qozǵalysy ýaqytsha toqtatyldy, dep habarlaıdy DW.
Frantsııanyń Vıssembýrg pen Germanııanyń Noıshtadt qalalary arasynda kele jatqan Deutsche Bahn aımaqtyq RB53 poıyzy temirjol ótkelinde júk kóligimen soqtyǵysty. Saldarynan jarylys bolyp, órt shyqty. Qaıǵyly oqıǵa Germanııanyń Reınland-Pfalts shtatyndaǵy Inshaım qalasyna jaqyn jerde boldy.
Polıtseıler men kýágerler oqıǵaǵa qatysty óz nusqalaryn aıtty
Polıtsııanyń málimetinshe, júk kóliginiń júrgizýshisi kólikti baıaý júrgizip, keptelis saldarynan temirjol ótkelinde toqtaǵan. Bul kezde jolaýshylar poıyzy jaqyndap qaldy. Júrgizýshi shuǵyl tejegishti basqanymen, soqtyǵysýdan qutyla almady.
Qıraǵan júk kóligi birneshe júz metrge ushyp, ótkeldiń janynda turǵan kólikti zaqymdady. Júk kóligi de, jeńil kólik te órtendi; júrgizýshi der kezinde kabınadan shyǵyp úlgerdi, biraq ushqan qoqystardan aýyr jaraqat aldy. Poıyzdaǵy úsh jolaýshy da kenet tejeý saldarynan jeńil jaraqat alyp, jaqyn mańdaǵy aýrýhanaǵa jetkizildi.
Kýágerlerdiń aıtýynsha, bir jergilikti turǵyn qutqarýshylar kelgenge deıin janyp jatqan júk kóligin sóndirýge árekettengen, biraq qyzyl jalyn des bermegen. Sondaı-aq zardap shekken júk kóliginiń júrgizýshisine alǵashqy medıtsınalyq kómek kórsetti.
Keltirilgen shyǵyn júzdegen myń eýroǵa baǵalanyp, poıyz qatynasy ýaqytsha toqtatyldy
Tergeýshiler apattan kelgen materıaldyq shyǵyn birneshe júz myń eýroǵa jetýi múmkin dep esepteıdi. Qırandylardy tazalaý túni boıy jalǵasyp, osy ýaqyt ishinde toqtatylǵan poıyzdardyń baǵyty boıynsha avtobýs qyzmeti uıymdastyryldy.
Jergilikti polıtsııa ókiliniń aıtýynsha, buzylǵan joldy poıyz qozǵalysy úshin qaıta ashý týraly sheshim qabyldanǵanǵa deıin temirjol relsterine keltirilgen zalaldyń kólemi áli baǵalanbaǵan.
Aıta keteıik, byltyr Germanııada jolaýshylar poıyzy relsten shyǵyp ketti. Oqıǵada úsh adam qaza taýyp, 34 jolaýshy jaraqat aldy.
