Germanııada jastar narazylyǵy tártipsizdikke ulasty
ASTANA. KAZINFORM – Germanııada 31 qazan kúni keshke ótken jastardyń jappaı narazylyq aktsııalary birqatar qalada tártipsizdikke ulasty, dep habarlaıdy Deutsche Welle.
Gen-Z regelt («Z urpaǵy sheshedi») qozǵalysy uıymdastyrǵan sherýler eldiń 30-dan astam qalasynda ótti. Uıymdastyrýshylardyń málimetinshe, narazylyq aktsııalaryna 100 myńnan astam adam qatysqan.
Frankfýrt-na-Maıne qalasynda sherýge shyqqandardyń bir bóligi dúkenderdiń áınekterin syndyryp, polıtsııa qyzmetkerlerimen qaqtyǵysqan. Tártipsizdik kezinde tutandyrǵysh quraldar da qoldanylǵan.
Berlınde ótken eń iri sherýlerdiń birinde quqyq buzýshylyq jasaǵany úshin 56 adam ustaldy. Al Keln qalasynda betperde taqqan jáne pırotehnıkalyq quraldar paıdalanǵan narazylyq bildirýshilerge qarsy polıtsııa sý atqyshtardy qoldandy.
Narazylyqqa qatysýshylar bilim berý sapasyn jaqsartýdy, ómir súrý qunynyń ósýine qarsy sharalar qabyldaýdy, klımatty qorǵaý saıasatyn kúsheıtýdi talap etip otyr.
Sonymen qatar olar psıhoterapııalyq kómek pen táýeldilikten emdelý qyzmetteriniń qoljetimdiligin arttyrýdy, mindetti áskerı qyzmet engizýden jáne áleýmettik shyǵyndardy qysqartýdan bas tartýdy talap etýde.
Germanııadaǵy sherýler sońǵy aptalarda Eýropanyń basqa elderinde de baıqalǵan jastar narazylyǵynyń jalǵasyna aınaldy.
Atap aıtqanda, Frantsııanyń birneshe qalasynda narazylyq aktsııalary tártipsizdikter men polıtsııamen qaqtyǵystarǵa ulasqan. Al Italııada 30 qazanda ótken sherýlerge uıymdastyrýshylardyń málimetinshe, bir mıllıonnan astam adam qatysqan.
Aıta keteıik, buǵan deıin Frantsııada bilim berý júıesindegi máselelerge baılanysty bastalǵan oqýshylar narazylyǵy jappaı sherýlerge ulasqan edi. Aktsııalarǵa stýdentter men muǵalimder qosylyp, polıtsııamen qaqtyǵystar kezinde júzdegen adam ustalǵan.
