Germanııada jas saıasatker «Zıg Haıl» dep natsıstershe sálem bergeni úshin qamaýǵa alyndy

Jaqynda Bavarııa parlamentine saılanǵan jas nemis saıasatkeri natsıstik materıaldardy saqtady degen aıyppen qamaýǵa alyndy. 22 jastaǵy Danıel Halembaǵa kórshileri shaǵymdanyp, polıtsııaǵa habar bergen. Olardyń aıtýynsha, jas saıasatkerdiń páterinen natsıstik sálemdeme estilgen, dep habarlaıdy Kazinform agenttigi BBC jańalyqtaryna silteme jasap. 

Halemba parlament múshesi retinde ımmýnıtet alýyna birneshe saǵat qalǵanda qamaýǵa alyndy.

Ol bıyl Bavarııa parlamentine saılanǵan «Germanııa úshin balama» (AfD) ońshyl partııasynyń 32 múshesiniń biri edi.

Jalpy AfD — osy eldegi eń iri oppozıtsııalyq partııa. 

Qyrkúıek aıynda Vıýrtsbýrg polıtsııasy Halembanyń stýdenttik qaýymdastyǵyna reıd júrgizdi. Óıtkeni kórshileri Germanııada Ekinshi dúnıejúzilik soǵystan beri tyıym salynǵan natsıstik «Zıg Haıl» sálemin estidik dep shaǵymdanǵan. 

Polıtseıler kórshilerdiń aıtqany rastalǵanyn, reıd barysynda zańsyz materıaldar tabylyp, tárkilengenin aıtty.

Halembany tutqyndaýǵa order juma kúni shyǵaryldy jáne ol dúısenbi kúni tańerteń Baden-Vıýrtembergtegi Shtýtgart mańynda ustaldy.

Qazir ol úkimetke qarsy úgit júrgizdi jáne Germanııada tyıym salynǵan natsıstik rámizderdi saqtady degen kúdikpen tergelip jatyr. 

«Olar meni múldem zańsyz ordermen qamaýǵa alǵysy keldi», — dedi Halemba qamaýǵa alynar aldynda áleýmettik jelide jarııalaǵan vıdeosynda.

Onyń advokaty Dýbravko Mandıch de klıentine taǵylǵan aıyptardyń eshbir negizi joq dep málimdeıdi.

Al Bavarııa parlamentindegi AfD fraktsııasynyń jetekshisi Katrın Ebner-Shtaıner Halemba saıası sebeptermen qýdalanyp jatqanyn aıtty.

Kóbine ımmıgratsııaǵa jáne sonymen birge Ýkraınaǵa qoldaý kórsetýge qarsy AfD sońǵy jyldary saılaýda kóp daýys jınap, saýalnamada únemi ekinshi orynda keledi.