Germanııada járdemaqy alatyn jastardyń ata-anasymen turýy talap etilýi múmkin
ASTANA. KAZINFORM — Tıýrıngııadaǵy Nordhaýzen aýdanynyń basshysy, Sotsıal-demokratııalyq partııanyń ókili Mattıas Iendrıke 25 jasqa tolmaǵan bazalyq járdemaqy alýshylarǵa ata-anasymen birge turýǵa múmkindik bolsa, bólek baspana aqysyn memleket ótemeýi kerek degen usynys aıtty. Bul týraly Kazinform Bild basylymyna silteme jasap habarlady.
— Járdemaqy alatyn jastar ata-anasymen birge tura alsa da, jeke páter jaldap jatady. Al onyń aqysyn biz tóleýimiz kerek. Bulaı bolmaýǵa tıis, — dedi ol Münchner Merkur basylymyna bergen suhbatynda.
Iendrıkeniń usynysy óz balalary joq 25 jasqa deıingi jastarǵa qatysty bolmaq. Alaıda otbasynda janjal bolyp, ata-anasymen birge turý múmkin bolmaǵan jaǵdaıda, bul talaptan bosatýǵa bolady. Degenmen mundaı kezde de memleket jeke páterdiń aqysyn emes, jataqhana sııaqty arzanyraq baspana túrlerin tóleýi kerek degen usynys aıtyldy.
Sondaı-aq ol kúmándi jaǵdaılarda jumyspen qamtý ortalyqtaryna járdemaqy alýshylarmen tek kádimgi poshta arqyly baılanysýǵa ruqsat berýdi usynyp otyr. Onyń pikirinshe, bul adamdardyń jalǵan mekenjaı kórsetý jaǵdaılaryn anyqtaýǵa kómektesedi.
Iendrıke memleket járdemaqy alatyn jastardy bilim alýǵa nemese jumysqa tezirek qaıtarýy kerek dep sanaıdy.
— Bári ózdiginen rettelip ketedi dep oılaý — qate. Bul jasta mundaı jaǵdaı jas adamnyń qalyptasýyna qatty áser etedi. Sonyń saldarynan ol memleket qarjysyna únemi ómir súretin adamǵa aınalýy múmkin, — dedi ol.
Eske salaıyq, buǵan deıin Germanııa Eýropalyq Odaq elderi arasynda jeke baspanasy bar turǵyndardyń úlesi boıynsha sońǵy orynda turǵanyn jazǵanbyz. Úı sharýashylyqtarynyń nebári 43,5 paıyzy óz úıinde nemese páterinde turady.
