Germanııada janarmaı salyǵy ýaqytsha tómendetiledi

ASTANA. KAZINFORM – Germanııa úkimeti baǵanyń ósýin tejeý maqsatynda energetıkalyq salyqty ýaqytsha tómendetetinin jarııalady, dep habarlaıdy DW.

Berlınde bıleýshi koalıtsııa — HDO/HSO jáne GSDP ókilderiniń habarlaýynsha, dızel men benzınge salynatyn salyq eki aı merzimge lıtrine shamamen 17 tsentke azaıtylady.

FRG kantsleri Frıdrıh Merts bul shara sońǵy aptalarda kúrt qymbattaýdan zardap shekken júrgizýshiler men kompanııalardyń jaǵdaıyn jedel jaqsartatynyn aıtty. Eńbek mınıstri Berbel Bas málimetinshe, nátıjesinde tutynýshylar men kásiporyndar úshin janarmaıǵa beriletin salyqtyq jeńildikterdiń jalpy kólemi shamamen 1,6 mlrd eýrony quraıdy.

Markýs Zeder aıtýynsha, «Irandaǵy soǵysty biz júrgizbesek te, onyń saldary bizge áser etedi». Ol janarmaı baǵasynyń ósýi kóptegen adamdar úshin «shydatpas deńgeıge» jetkenin atap ótti.

Baǵanyń kúrt qymbattaýyna baılanysty kelissózder demalys kúnderi boıy Berlın qalasynda júrgizilip, jalpy 24 saǵatqa sozylǵan.

Bul sharalar paketi koalıtsııanyń aýqymdy josparynyń bir bóligi bolyp tabylady. Sonymen qatar:

2026 jyly jumys berýshilerge qyzmetkerlerge 1000 eýro kóleminde salyq pen jarnalardan bosatylǵan ústemaqy tóleýge ruqsat berý josparlanǵan;
2027 jylǵy 1 qańtardan bastap tómen jáne orta tabysy bar azamattardy qoldaýǵa baǵyttalǵan tabys salyǵy reformasy engiziledi;
osy ózgeristerden týyndaıtyn bıýdjet tapshylyǵyn óteý úshin bıyl temeki ónimderine salyqty arttyrý kózdelip otyr.

Aıta ketelik Germanııada janarmaı daǵdarysy aıasynda elektromobılder satylymy kúrt ósti.