Germanııada janarmaıdyń qymbattaýyna baılanysty avtobandarda jyldamdyqty shekteý usynyldy
ASTANA. KAZINFORM — Germanııada benzın men dızel otynynyń qymbattaýyna baılanysty avtobandarda ýaqytsha jyldamdyq shekteýin engizý usynyldy. Bul bastamany «Odaq-90/Jasyldar» partııasynyń birlesken tóraǵasy Felıks Banashak kóterdi. Bul týraly BELTA jazdy.
— Ýaqytsha jyldamdyq shekteýi otyn tutynýdy birden tómendetedi, osylaısha baǵanyń ósýin tejeıdi jáne jumysqa kólikke táýeldi barlyq adamdarǵa bıýrokratııasyz, ózara qoldaý prıntsıpi boıynsha kómek kórsetedi, — dedi Banashak Der Spiegel jýrnalymen suhbatynda.
Onyń sózinshe, qazirgi jaǵdaıda «adamdardy jáne kásiporyndardy qorǵaý úshin negizgi sharalardy qabyldaý qajet».
Banashak Germanııa kantsleri Frıdrıh Merts pen onyń úkimetin bul máseleni «tym abaılap» sheship otyrǵany úshin synǵa aldy.
– Olar azamattardan qorqady, biraq azamattar birneshe ret daǵdarys kezinde sanaly áreket jasaýǵa daıyn ekenin dáleldedi. Eger olar mánin kórse jáne úkimet óz mindetin durys ári pragmatıkalyq oryndasa, — dedi «Jasyldardyń» lıderi.
Basqa usynystar qatarynda qoǵamdyq kóliktiń 9 eýroǵa arnalǵan ýaqytsha jolaqysyn qaıta engizý, sondaı-aq munaı kompanııalarynyń artyq paıdasyna salyq salý bar. Saıasatkerdiń pikirinshe, bul halyqqa, sonyń ishinde elektr energııasyna jumsalatyn shyǵyndardy azaıtý arqyly qoldaý kórsetýge múmkindik beredi.
Germanııada janarmaı baǵasynyń ósýi Batys Azııadaǵy qaqtyǵystarǵa baılanysty bolyp otyr. 2 sáýirdegi derekter boıynsha dızeldiń ortasha baǵasy lıtrine 2,3 eýroǵa, Super E10 benzıni — lıtrine 2,13 eýroǵa jetip, bıylǵy jyldyń eń joǵary kórsetkishine shyqty.
Eske sala keteıik, buǵan deıin Túrkııada janarmaı baǵasy kúrt óskenin jazdyq.
