Germanııada janarmaı baǵasyn kúnine bir ret qana kóterýge ruqsat berilýi múmkin
ASTANA. KAZINFORM — Germanııa úkimeti benzın men dızel baǵasynyń ósýin shekteý úshin janarmaı quıý beketterine baǵany kúnine bir ret qana kóterýge ruqsat beretin jańa ereje engizýdi josparlap otyr, dep habarlaıdy DW.
Bul týraly eldiń ekonomıka mınıstri Katarına Raıhe málimdedi.
Mınıstrdiń aıtýynsha, janarmaı baǵasyn tómendetýge táýliktiń kez kelgen ýaqytynda ruqsat beriledi. Alaıda jańa normanyń naqty qashan kúshine enetini ázirge belgisiz.
Iran tóńireginde soǵys bastalǵaly beri Germanııada janarmaı baǵasy 12 kún qatarynan ósip, bir lıtri 2 eýrodan asty.
Birneshe partııanyń saıasatkerleri bul jaǵdaıdy synǵa alyp, baǵanyń tym tez kóterilgenin aıtty. Olardyń pikirinshe, kún saıyn jumysqa qatynaıtyn adamdar artyq tóleýge májbúr bolyp otyr.
Sonymen qatar Germanııa úkimeti janarmaı naryǵyna baqylaýdy kúsheıtý úshin karteldik vedomstvo men monopolııaǵa qarsy qyzmetterdiń ókilettigin arttyrý múmkindigin de qarastyryp jatyr.
Eske salsaq Taıaý Shyǵystaǵy qarýly qaqtyǵys elimizdegi benzın baǵasyna qalaı áser etetinin jazǵan edik.
