Germanııada jańa jyldan bastap mindetti medıtsınalyq saqtandyrý qymbattaıdy

ASTANA. KAZINFORM — 2026 jyly Germanııada medıtsınalyq saqtandyrý kompanııalaryna tólenetin jarna ósedi, dep habarlaıdy BILD.

Bul týraly Germanııadaǵy eń iri saqtandyrý kompanııalarynyń biri Techniker Krankenkasse basshysy Iens Baas málimdedi.

Onyń aıtýynsha, Densaýlyq saqtaý mınıstrligi shyǵyndardy qysqartýǵa baǵyttalǵan sharalar paketin júzege asyra almaǵan, al saqtandyrý kassalary óz rezervterin qaıta tolyqtyrýy tıis.

Buǵan deıin Densaýlyq saqtaý mınıstrligi qosymsha jarnany 2,9% deńgeıinde saqtap qalýdy josparlaǵan. Alaıda densaýlyq saqtaý salasyndaǵy shyǵyn tabysqa qaraǵanda jyldam ósip otyr. Sonymen qatar, memlekettik medıtsınalyq saqtandyrý kassalary zań boıynsha belgili bir qarjylyq rezervke ıe bolýy mindetti.

— Meniń oıymsha, jyldyń basynda qosymsha jarna 3%-dan sál asady. Keıbir kassalar jarnany jyl saıynǵy ádettegi tsıklden tys ýaqytta da kóterýge májbúr bolady, — dedi Techniker Krankenkasse basshysy Iens Baas.

Baas densaýlyq saqtaý júıesiniń barlyq salasynda shyǵyndy azaıtý úshin aýqymdy reforma júrgizý qajet ekenin atap ótti.

— Medıtsınalyq saqtandyrý kassalarynan bastap, ambýlatorııalyq dárigerler men aýrýhanalarǵa deıin, búkil júıede túbegeıli ózgeris jasaýymyz kerek, — dedi ol.

Aıta ketelik Germanııada qańtar aıynda áskerge shaqyrýdyń jańa júıesi kúshine enedi.