Germanııada jańa jyl túni ondaǵan polıtseı pırotehnıkadan jaraqat aldy
ASTANA. KAZINFORM — Berlınde kezekshilikke shyqqan 4300 polıtsııa qyzmetkerine birneshe ret petarda men zymyrandar atylǵan. Bul týraly jergilikti quqyq qorǵaý organdary habarlady, dep jazady DW.
Osyndaı shabýyldar men kúdiktilerdiń qarsylyǵy saldarynan 21 polıtseı jeńil jaraqat alǵan. Aldyn ala málimet boıynsha, qalada shamamen 400 adam ýaqytsha ustalǵan, sondaı-aq birneshe keli zańsyz pırotehnıka tárkilengen.
Gambýrgte de jaǵdaı kúrdeli boldy: keminde 10 polıtseı jaraqat alyp, qyzmetin jalǵastyra almaǵan. Bul týraly jergilikti polıtsııa basqarmasy málimdedi.
Leıptsıgte pırotehnıkalyq shabýyldarǵa polıtsııa qyzmetkerleri men jedel qyzmet ókilderi ushyraǵan. Qala ortalyǵynda birneshe órt oqıǵasy tirkelgen, dep habarlady dpa agenttigi.
Sońǵy jyldary jedel qyzmet ókilderine jasalatyn shabýyldar jıilegendikten, Germanııa polıtsııasy jańa jyl túni kúsheıtilgen rejımde qyzmet atqardy. Olardy pırotehnıkalyq buıymdarmen atqylaý jaǵdaılary jıi baıqalady.
Soǵan qaramastan, jergilikti polıtsııanyń habarlaýynsha, Berlınde bıylǵy jańa jyl túni burynǵy jyldarǵa qaraǵanda salystyrmaly túrde tynysh ótken kórinedi.
Budan buryn Germanııanyń batysynda bolǵan jarylysqa zańsyz pırotehnıka sebep bolýy múmkin ekeni aıtyldy.