Germanııada XIII ǵasyrdaǵy qamal 1 eýroǵa satylymǵa shyǵaryldy

ASTANA. KAZINFORM — Germanııanyń Saksonııa jerindegi Bad-Dıýben qalasynyń bıligi shamamen 800 jyl buryn salynǵan Shnadıtts qamalyna satyp alýshy izdep jatyr, dep habarlaıdy BILD.

Germanııada XIII ǵasyrdaǵy qamal 1 eýroǵa satylymǵa shyǵaryldy
Foto: BILD

Nysan nebári 1 eýroǵa satylmaq. Jańa ıesi jalpy aýmaǵy 1012 sharshy metr bolatyn tarıhı ǵımaratqa ıe bolady. Qamal ishinde batyrlar zaly saqtalǵan, al ǵımarattyń aınalasy ormen qorshalǵan jáne eki munarasy bar.

- Qamaldyń saqtalyp qalǵanyn qalaımyn. Bul ǵımarat óńir men búkil Saksonııa úshin mańyzdy. Árıne, qazirgi syrtqy kelbeti kóńil kónshitpeıdi, áli isteletin jumys kóp. Biraq shatyry bútin, – dedi qala meri Matıas Mıt BILD basylymyna bergen suhbatynda.

Jergilikti bıliktiń baǵalaýynsha, qamaldy tolyq qalpyna keltirýge shamamen 20 mln eýro qajet. Tarıhı ǵımarat memleket qorǵaýynda bolǵandyqtan, jóndeý jumystarynyń barlyǵy eskertkishterdi qorǵaý organdarymen kelisilýi tıis. Bul qalpyna keltirý merzimin edáýir uzartýy múmkin.

Buǵan deıin de ınvestorlar qamaldy saqtap qalýǵa áreket jasaǵan. 2014 jyly amerıkalyq áıel men onyń uly munda qonaqúı, barbekıý meıramhanasy jáne sharap baryn ashýdy josparlaǵan. Alaıda jobaǵa ýáde etilgen mıllıondardyń ornyna shamamen 400 myń eýro ǵana ınvestıtsııalanǵan.

2018 jyly satyp alý-satý sharty buzylyp, ǵımarat qaıtadan qala menshigine ótken.

Aıta ketelik Baltyq teńizindegi aral aýktsıonda 60 myń eýroǵa satylǵan edi.