Germanııada úkimettiń jumysyna kóńili tolmaıtyndardyń qatary kóbeıgen

ASTANA. KAZINFORM — Germanııada Hrıstıan-demokratııalyq odaǵy (CDU/CSU) men Sotsıal-demokratııalyq partııadan (SPD) quralǵan koalıtsııalyq úkimettiń jumysyna qanaǵattanbaıtyn turǵyndar úlesi 66 paıyzǵa jetken. Bul týraly Anadolu agenttigi jazdy.

Bild am Sonntag basylymynyń tapsyrysy boıynsha Insa qoǵamdyq pikirdi zertteý ınstıtýty júrgizgen saýalnama nátıjeleri boıynsha, Germanııa halqynyń basym bóligi Frıdrıh Merts basqaryp otyrǵan úkimettiń qyzmetine narazy ekenin kórsetti.

Saýalnamaǵa qatysqandardyń 66 paıyzy úkimettiń jumysyna qanaǵattanbaıtynyn aıtsa, tek 25 paıyzy onyń qyzmetine oń baǵa bergen.

Respondentterdiń 49 paıyzy qazirgi úkimet 2029 jylǵa deıingi zań shyǵarýshylyq merzimin sońyna deıin atqara almaıdy dep esepteıdi, al 32 paıyzy onyń merzimin tolyq aıaqtaıtynyna senedi.

Zertteý nátıjesine sáıkes, elektorat kózqarasy boıynsha ýltraońshyl «Germanııa úshin alternatıva» (AfD) partııasy 26 paıyz daýys jınap, eń kúshti saıası kúsh retinde qalyp otyr.

Sonymen qatar Hrıstıan-demokratııalyq odaq pen Hrıstıan-áleýmettik odaqtyń (HDS/HSS) reıtıngi 24 paıyzdy, al Sotsıal-demokratııalyq partııanyń (SDPG) kórsetkishi 15 paıyzdy qurady.

Saýalnamada koalıtsııa quramyndaǵy eki partııanyń reıtıngi sońǵy segiz aıda ótken saılaýdaǵy nátıjemen salystyrǵanda tómendegeni baıqalady: ol kezde olar birlesip 45 paıyz daýys jınaǵan bolsa, qazir bul kórsetkish 39 paıyzǵa deıin azaıǵan.

Aıta keteıik, Germanııada jumyssyzdar sany úsh mıllıonnan asqanyn jazǵanbyz. 

Al Qytaı Germanııany ınnovatsııalyq elder reıtıngisinde basyp ozdy.