Germanııada týrısterdi qoqys jınaǵany úshin yntalandyrmaq

TÚRKІSTAN. KAZINFORM —  Berlınde qaladaǵy qoqysty jınaǵany úshin týrısterdi yntalandyrý josparlanyp otyr, dep habarlaıdy BILD.

Berlın bıligi qaladaǵy qoqys máselesin sheshýdiń jańa jolyn izdep jatyr.

Jaz mezgilinde týrısterge Shpree ózeninen qoqys jınaǵany úshin bonýs nemese jeńildikter berý júıesin iske qosý josparlanǵan. Bul ıdeıa Danııadaǵy CopenPay jobasynan shabyt alǵan: qonaqtar shyǵynyn azaıtyp, Berlın jaǵalaýlary men sý aıdyndaryn tazartady dep úmittenedi.

Sonymen qatar Germanııa astanasynda qoqysqa qarsy dástúrli sharalar da kúsheıtilip jatyr.

Máselen, kóshege qoqys tastaǵany úshin salynatyn aıyppul aıtarlyqtaı ósken. Endi bir rettik staqan tastaǵany úshin 55 eýronyń ornyna 250 eýro aıyppul qarastyrylǵan.

Tek 2025 jyly qalanyń tazalyq qyzmeti zańsyz tógilgen qoqysty shyǵarý úshin 13 mıllıon eýro jumsaǵan.

Qazirgi ýaqytta Berlınniń barlyq 12 aýdanynda arnaıy ınspektorlar sany 68 adamǵa deıin kóbeıtilmek. Olar temeki tuqyly nemese qap sııaqty usaq zań buzýdy qadaǵalaıdy, al problemaly aımaqtarda qurylys qaldyqtaryn, eski tehnıkany zańsyz tastaıtyndardy anyqtaıdy.

Sonymen qatar qalada bir rettik qaptamaǵa salyq engizý máselesi talqylanyp jatyr.

Qoldaýshylar bul shara mıllıondaǵan eýro kiris ákelip, qoqys kólemin azaıtady dese, qarsy tarap dámhana men meıramhanalar úshin qosymsha bıýrokratııalyq júkteme bolatynyn eskertedi.

Aıta ketelik 2045 jylǵa qaraı Germanııada halyq sany kúrt qysqarýy múmkin ekeni týraly jazǵan edik.