Germanııada tótenshe jaǵdaılarǵa arnalǵan memlekettik gaz qory qurylmaq
ASTANA. KAZINFORM – Germanııanyń Ekonomıka jáne energetıka mınıstrligi tótenshe jaǵdaılar kezinde paıdalanylatyn memlekettik gaz qoryn qurý josparyn ázirledi, dep habarlaıdy DW.
Jobany qarjylandyrýǵa 1 mıllıard eýrodan astam qarajat jumsalady. Bul shyǵyndar gaz tutynýshylarynan alynatyn arnaıy alym esebinen óteledi.
Memlekettik gaz qory qys mezgilindegi maýsymdyq suranysty jabýǵa arnalmaǵan. Onyń negizgi maqsaty – ınfraqurylymǵa jasalatyn dıversııalar nemese álemdik gaz tapshylyǵy sııaqty tótenshe jaǵdaılarda eldiń energııa qaýipsizdigin qamtamasyz etý.
Aldyn ala esep boıynsha, qor kólemi shamamen 24 teravatt-saǵat gaz. Bul Germanııadaǵy gaz qoımalarynyń jalpy syıymdylyǵynyń 10 paıyzynan sál az. Mundaı kólem ımporttyq ınfraqurylymdaǵy iri nysannyń jumysy 30 kúnge toqtaǵan jaǵdaıda gazben qamtýdy saqtaýǵa múmkindik beredi.
Sondaı-aq bul qor suıytylǵan tabıǵı gaz ımportynyń 40 kúnge toqtaýyn óteýge nemese qatty aıaz jaǵdaıynda turǵyndar men kommertsııalyq tutynýshylardy 10 kún boıy gazben qamtamasyz etýge jetkilikti bolady. Qalypty qys jaǵdaıynda qor shamamen 18 kúnge jetedi.
Gaz qoryn qurýǵa, gaz satyp alýǵa jáne ony qoımalarǵa aıdaýǵa 1,2–1,5 mıllıard eýro jumsaý josparlanǵan. Qarajat 2027–2028 jyldary bólinedi. Jyl saıynǵy paıdalaný shyǵyndary 150–180 mıllıon eýro.
Germanııa úkimeti bul másele boıynsha resmı sheshimdi tamyz aıynyń ortasynda qabyldaýdy josparlap otyr. Eger Býndestag usynysty qyrkúıek aıynyń sońynda maquldasa, memlekettik gaz qoryn qurý týraly sheshim 2027 jylǵy 1 qańtardan bastap kúshine enýi múmkin.
Sonymen qatar Germanııadaǵy gaz qoımalary jyl saıyn 1 qarashaǵa deıin keminde 80 paıyzǵa toltyrylýy tıis. Al Eýropalyq odaq talaptaryna sáıkes, jylytý maýsymy bastalǵanǵa deıin gaz qoımalaryndaǵy qor shamamen 90 paıyz deńgeıinde bolýy qajet.
