Germanııada tól oıynymyz - toǵyzqumalaqtan jarys ótti (FOTO)
ASTANA. QazAqparat - Tól oıynymyz - toǵyzqumalaqtan 23-24 shilde kúnderi Germanııanyń Shvaınfýrt qalasynda Eýropa chempıonaty ótti. Bul týraly Dúnıejúzilik toǵyzqumalaq federatsııasynyń baspasóz qyzmeti habarlady.
Atalǵan birinshilikte Germanııa, Frantsııa, Grekııa, Shveıtsarııa, Ispanııa, Reseı, Chehııa jáne taǵy basqa onnan asa memlekettiń sportshylary ózara myqtylardy anyqtady.
Bul básekede sportshylar shveıtsar júıesi boıynsha, erler men áıelder arasynda jeke-jeke synǵa tústi.
Eýropa chempıonatynyń ashylýyna Dúnıejúzilik toǵyzqumalaq federatsııasynyń prezıdenti Álıhan Baımenov pen Qazaqstan Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov, Shvaınfýrt meri Karl Haınts Kaýchok qatysty.
Eýropa chempıonaty barysyndaǵy halyqaralyq týrnırge Qazaqstan Ulttyq qurama komandasy músheleri de qatysyp, sheteldik sportshylardyń sheberligin arttyryp, tájirıbe jınaqtaýyna kómek qoldaryn sozdy. Jarysqa negizinen Eýropa elderinde turyp jatqan jergilikti toǵyzqumalaq áýestenýshileri qatysty.
Osy birinshilik barysynda, ulttyq oıyndy halyqaralyq deńgeıde odan ári damytý máseleleri de keńinen talqylandy. Aldaǵy ýaqytta toǵyzqumalaqtan Azııa chempıonaty ótedi. Bul básekeni uıymdastyryp ótkizýge Qytaı ókimeti usynys jasap otyrǵan kórinedi.
Qazirgi tańda Qazaqstanda toǵyzqumalaqpen aınalysatyndardyń sany 200 myńnan asady. Osyǵan qarap, elimizde tól oıynymyz jaqsy damyp kele jatqanyn baıqaýǵa bolady.
