Germanııada toǵyzqumalaqtan Eýropa chempıonaty bastaldy (FOTO)
ASTANA. QazAqparat - 23-24 shilde kúnderi Germanııanyń Shvaınfýrt qalasynda toǵyzqumalaqtan Eýropa chempıonaty ótedi. Búgin bastalǵan Eýropa chempıonatyna Qazaqstan, Germanııa, Frantsııa, Grekııa, Shveıtsarııa, Ispanııa, Reseı, Chehııa men taǵy basqa on eldiń sportshylary qatysyp jatyr.
Bul týraly QazAqparat tilshisine Halyqaralyq toǵyzqumalaq federatsııasynyń baspasóz qyzmeti habarlady.
Derekkózine súıensek, Eýropa chempıonatynyń ashylýyna Dúnıejúzilik toǵyzqumalaq federatsııasynyń prezıdenti Álıhan Baımenov pen Qazaqstan Mádenıet jáne sport mınıstrligi Sport jáne dene shynyqtyrý isteri Komıtetiniń tóraǵasy Elsııar Qanaǵatov, Shvaınfýrt meri Karl Haınts Kaýchok qatysqan.
«Chempıonat - ıntellektýaldyq saıys, mádenı shara ǵana emes, mádenı muramyzdy nasıhattaý joly. Al, bul - dúnıejúzilik federatsııanyń qurylǵan kúninen bastap alǵa qoıǵan mindetteriniń biri», - dep atap ótti jarystyń ashylý saltanatynda Álıhan Baımenov.
Dúnıejúzilik federatsııa 2009 jyldan beri toǵyzqumalaqtan úsh ret álem chempıonatyn ótkizgen. Qazirgi tańda toǵyzqumalaqpen aınalysatyn qazaqstandyqtar sany 200 myń adamnan asty. Alda Azııa chempıonatyn uıymdastyrýǵa Qytaı ókimeti óz tarapynan qoldaý kórsetýge nıet bildirip otyr.
