Germanııada TikTok-qa balama jańa áleýmettik jeli iske qosylady
ASTANA. KAZINFORM – Germanııada qysqa vıdeolarǵa arnalǵan jańa áleýmettik jeli – Wedium platformasy iske qosylady, dep habarlaıdy ARD.
Berlındik startap ázirlegen joba avtorlary ony «sanaly TikTok» retinde tanystyryp otyr. Platformada balalardyń quqyqtaryn qorǵaýǵa erekshe kóńil bólinedi. Kontent jarııalaý úshin paıdalanýshylar jeke kýálik arqyly tirkelýi tıis. Ázirleýshiler tobyna jasóspirimderdiń ata-analary da kirgen.
Joba avtorlary Wedium-di «100 paıyz eýropalyq ónim» dep atap, onda bottar bolmaıtynyn, heıt, jalǵan aqparat jáne manıpýlıatsııalarǵa tyıym salynatynyn málimdedi. Sonymen qatar, paıdalanýshylarǵa arnalǵan qatań jelilik etıka erejeleri engiziledi.
Aıta keteıik, bul platformada TikTok sekildi qoldanýshylardy uzaq ýaqyt ustap turatyn táýeldilik týdyratyn algorıtmder bolmaıdy. Blogerlerge jarnamadan túsetin tabystyń 50 paıyzy usynylady. Al jarnamasyz paıdalanǵysy keletinder úshin aı saıynǵy jazylym quny 9 eýro bolady.
Jobanyń tolyq iske qosylýy shilde aıyna josparlanǵan. Qazirdiń ózinde kútý tizimine 10 myńnan astam adam tirkelgen. Salystyrý úshin, TikTok qoldanýshylarynyń sany álem boıynsha shamamen 1,5 mlrd adamdy quraıdy.
NTV telearnasynyń málimetinshe, Germanııada jasóspirimderge arnalǵan áleýmettik jelilerdi shekteý nemese arnaıy platformalar qurý máselesi belsendi talqylanyp jatyr. Sarapshylar Wedium dál osy segmentti qamtýy múmkin ekenin aıtady.
Aıta keteıik, Grekııada 15 jasqa tolmaǵan balalardyń áleýmettik jelige kirýine tyıym salynady.
