Germanııada tesilgen qubyrdan 25 metrlik munaı burqaǵy atqylady
ASTANA. KAZINFORM — Germanııanyń shyǵysyndaǵy Brandenbýrg jerinde zaqymdanǵan munaı qubyrynan kóp kólemde munaı tógildi. Bul týraly DPA agenttigi habarlady.
Agenttik dereginshe, oqıǵa PCK munaı óńdeý zaýytyna tıesili qubyrda Gramtsov eldi mekenine jaqyn mańda tirkelgen. Oqıǵa ornynda órt sóndirý qyzmetiniń qyzmetkerleri jumys istep jatyr.
«Qazirgi ýaqytta oqıǵanyń sebepteri men zaqymdaný aýqymy týraly aqparat bere almaımyz», dep málimdedi vedomstvo.
Óz kezeginde Märkische Oderzeitung gazeti apat munaı qubyryna júrgizilgen jumystar kezinde bolǵanyn naqtylady. Tógilgen munaıdyń saldarynan qubyrdan bıiktigi shamamen 25 metr bolatyn munaı burqaǵy atqylaǵan. Brandenbýrgtiń qorshaǵan orta mınıstri Hanka Mıttelshtedt zalaldyń kólemin baǵalaý úshin beısenbi kúni oqıǵa ornyna barýdy josparlap otyrǵanyn habarlady.
Eske sala ketsek, qarasha aıynda Qazaqstan munaıynyń Germanııaǵa jetkizilimi 25 paıyzǵa artqanyn jazdyq.