Germanııada temirjoldaǵy aqaýǵa baılanysty poıyzdar toqtatyldy
ASTANA. KAZINFORM — Bul aqparatty Germanııanyń ulttyq temirjol operatory — Deutsche Bahn kompanııasynyń ókili rastady. Aqaý temirjoldaǵy tsıfrlyq radıobaılanys júıesinde (GSM-R) týyndaǵan. Qazirgi ýaqytta tehnıkalyq mamandar máseleni jedel túrde joıý jumystaryn júrgizip jatyr, dep habarlaıdy Bild.
— Qazir biz poıyzdardy jolaýshylar túsip kete alatyndaı stantsııalarǵa jetkizýge tyrysyp jatyrmyz. Odan keıin aqaýdy joıýymyz kerek. Ázirge onyń naqty sebebi belgisiz, — dedi temirjol kompanııasynyń bas dırektory Evelın Palla.
Aqaý saldarynan el boıynsha temirjol qozǵalysy turalap qaldy. Másele joǵary jyldamdyqty qalaaralyq poıyzdarǵa da, qala mańyndaǵy qatynastarǵa da áser etken. Berlın men Mıýnhendegi S-Bahn qalalyq elektr poıyzdarynyń qozǵalysy da toqtatyldy.
Deutsche Bahn kompanııasynyń málimetinshe, qozǵalys qaýipsizdigi tolyq qamtamasyz etilgenge deıin poıyzdar qolaıly stantsııalarda ýaqytsha turady. Osyǵan baılanysty reısterdiń keshigýi boljanǵan.
Aqaýǵa baǵdarlamalyq qamtamasyz etýdi jańartý sebep bolýy múmkin. Alaıda bul aqparatty temirjol kompanııasy ázirge resmı túrde rastaǵan joq.
Aıta keteıik, Frantsııada aptap ystyq pen elektr jelisiniń buzylýyna baılanysty poıyz jolaýshylary evakýatsııalandy.
