Germanııada táýligine 2000-nan astam koronavırýs juqtyrý jaǵdaıy tirkeldi
BERLIN. QazAqparat – Germanııada koronavırýs juqtyrý jaǵdaılarynyń eń kóp kúndizgi ósim kórsetkishi taǵy tirkeldi.
Robert Koh ınstıtýty ótken táýlikte elde 2034 adamnyń koronavırýs juqtyrǵanyn málim etti, dep habarlaıdy QazAqparat dw saıtyna silteme jasap.
Bul – sáýir aıynyń sońynan bergi eń kóp vırýs juqtyrý kórsetkishi. Naýryz aıynyń sońy men sáýir aıynyń basynda SARS-CoV-2 jaǵdaılarynyń maksımaldy táýliktik ósimi – 6000-nan asqan.
Ásirese aýrýǵa shaldyǵý jaǵdaılarynyń kópshiligi eldiń batys jáne ońtústiginde, sondaı-aq Berlınde tirkelgen. Sońǵy málimetter boıynsha, Germanııada SARS-CoV-2 pandemııasy bastalǵannan beri 232 082 adam indetke shaldyqqan, 206 600 adam saýyǵyp shyqqan. Koronavırýs ınfektsııasynan 9267 adam qaıtys boldy.
Sarapshylar ınfektsııa juqtyrý jaǵaılary Germanııada da Eýropanyń basqa elderinde de aıtarlyqtaı artyp kele jatqandyǵyn aıtady.
Koronavırýs juqtyrý jaǵdaılary kóbine adamdardyń ózge elderden demalystan qaıtyp kelip jatýyna jáne toı-tomalaqtardyń kóptep uıymdastyrylýymen baılanysty artqan.
Osyǵan baılanysty Germanııa kantsleri Angela Merkel koronavırýsqa qatysty shekteýlerdiń odan ári jeńildetilýine qarsy shyqty. GFR Densaýlyq saqtaý mınıstri Iens Shpan aldaǵy karnaval maýsymyn tolyǵymen alyp tastaýǵa shaqyrdy.
