Germanııada sý qory kúrt azaıdy
ASTANA. KAZINFORM – Germanııada sý tapshylyǵy kúsheıip barady. Gelmgolts atyndaǵy Geoaqparattyq zertteý ortalyǵynyń (GFZ) dereginshe, 2026 jylǵy maýsymda eldegi sý qory aldyńǵy jyldardaǵy ortasha kórsetkishten 25 mlrd tonnaǵa az bolǵan. Bul týraly BILD jazdy.
Bul kólem Boden kólindegi sý qorynyń jartysynan kóbine nemese shamamen 10 mln olımpıadalyq basseınge teń. Zertteýshilerdiń málimetinshe, bul kórsetkishke 2026 jylǵy ystyq jazdyń saldary áli engizilgen joq.
Ǵalymdar sý kólemin anyqtaý úshin jer betindegi jáne jer astyndaǵy sý qoryn ólsheıtin GRACE Follow-On spýtnıktik mıssııasynyń derekterin paıdalanǵan.
Zertteý nátıjesi Germanııada 2015 jyldan beri aldyńǵy 15 jylmen salystyrǵanda qurǵaq kezeńniń kúsheıgenin kórsetti. Ásirese jerasty sýlarynyń azaıýy alańdatyp otyr. Zertteýshiler uzaq merzimdi sý qorynyń kemýine negizinen osy faktor áser etip otyrǵanyn atap ótti.
2024 jyly mol jaýyn-shashynnan keıin jaǵdaı ýaqytsha jaqsarǵanymen, keıin sý qory qaıtadan kúrt tómendegen. 2025 jyldyń jazynda sý qory spýtnıktik baqylaýlar bastalǵaly beri buryn-sońdy bolmaǵan deńgeıde azaıǵan.
2026 jylǵy maýsymda sý tapshylyǵy 25 mlrd tonnaǵa jetti. Salystyrý úshin, Boden kólinde shamamen 48 mlrd tonna sý bar.
Sý qorynyń azaıýy ásirese Germanııanyń ońtústigi, ońtústik-batysy jáne shyǵysynda baıqalǵan. Al Soltústik teńizge jaqyn ornalasqan soltústik-batys óńirlerde jaǵdaı birshama turaqty.
Ǵalymdardyń boljamynsha, jaýyn-shashyn mólsheri normadan joǵary bolǵan kúnniń ózinde sý qory jyl sońyna deıin qalpyna kelmeýi múmkin.
Joǵary temperatýra topyraq pen sý aıdyndaryndaǵy sýdyń býlanýyn kúsheıtedi. Sonymen qatar ósimdikter de atmosferaǵa kóbirek ylǵal bóledi. Bul faktorlar sý tapshylyǵyn odan ári ýshyqtyrýy yqtımal.
Aıta keteıik, buǵan deıin Dýnaıdyń tartylýy saldarynan Rýmynııa jalǵyz AES-in toqtatqan edi.
