Germanııada stomatologııalyq kómek tolyqtaı aqyly bolady

ASTANA. KAZINFORM – Germanııanyń bıliktegi partııasy sanalatyn Hrıstıan-demokratııalyq odaǵy quramyndaǵy ekonomıkalyq keńes stomatologııalyq qyzmetterdi standartty medıtsınalyq saqtandyrý júıesinen tolyq alyp tastaýdy usyndy, dep jazady DW.

Qazirgi ýaqytta Germanııadaǵy mindetti medıtsınalyq saqtandyrý tis dárigerleriniń bazalyq qyzmetterin qamtıdy. Sonymen qatar kóptegen azamat keramıkalyq qaptamalar, ımplanttar, sapaly protezder men breketter sekildi qyzmetterdi óteıtin qosymsha stomatologııalyq saqtandyrýdy jeke satyp alady.

Ekonomıkalyq keńestiń usynysyna sáıkes, stomatologııalyq qyzmetter standartty saqtandyrýdan tolyqtaı shyǵarylyp, azamattar tis dárigerine qaralý men emdeý shyǵyndaryn óz qaltasynan tóleýi tıis. Bul bastamany keńestiń bas hatshysy Volfgang Shtaıger málimdegen.

Atalǵan ekonomıkalyq keńes Germanııadaǵy konservatıvti blok Hrıstıan-demokratııalyq odaq janynda jumys isteıdi. Qazirgi ýaqytta bul saıası kúsh eldegi bılik koalıtsııasyn basqaryp otyr. Keńes quramyna Germanııadaǵy shamamen 13 myń kompanııanyń ókilderi kiredi.

Usynylǵan jospar stomatologııamen shektelmeıdi. Qujatta jumyssyzdyq boıynsha járdemaqyny bir jylmen shekteý, balalardy tárbıelegeni úshin analarǵa esepteletin zeınetaqy ótilin alyp tastaý jáne zeınet jasyn kóterý sekildi sharalar da qarastyrylǵan.

Ekonomıkalyq keńes ókilderiniń pikirinshe, bul qadamdar áleýmettik shyǵyndardy qysqartýǵa, memlekettik bıýdjetke túsetin júktemeni azaıtýǵa jáne el ekonomıkasyn yntalandyrýǵa múmkindik beredi.

Aıta keteıik, Danone quramynan ýly zat anyqtalǵan balalar taǵamyn Germanııadan keri qaıtaryp jatyr.