Germanııada sınagoganyń janynda atys boldy
NUR-SULTAN. QazAqparat – Germanııanyń shyǵysynda ornalasqan sınagoganyń janynda atys boldy. Jergilikti polıtsııanyń málimdeýinshe, eki adam opat bolǵan, dep habarlaıdy QazAqparat.
Sársenbi kúni belgisiz bireý Galle qalasynda (Saksonııa-Anhalt federaldyq jeri) avtomattan oq jaýdyrǵan.
Oqys oqıǵa saldarynan eki adam mert boldy.
«Qolda bar derekter boıynsha eki adam qaza tapqan. Oq jaýdyrǵandar avtomobılge minip, izin sýytqan», - dep jazdy qalalyq polıtsııa Twitter-de.
Tártip saqshylary turǵyndardan páterinen shyqpaýyn, oqys oqıǵa bolǵan jerde júrmeýin eskertip jatyr.
Bild gazetiniń jazýynsha, atys sınagoganyń janynda bolǵan. Belgisiz bireý evreıler jerlengen molaǵa granat ta laqtyrǵan.
Odan keıin Galle túbindegi Vıdersdorf eldi mekeninde de atys bolǵan. Biraq ol týraly tolyqtaı aqparat joq.
Polıtsııa atys bolǵan jerdi qorshaýǵa aldy.
Deutsche Bahn kontserni atysqa baılanysty qaladaǵy temirjol vokzalyn japqanyn málimdedi.
