Germanııada shveıtsarııalyq tyńshy ustaldy
ASTANA. QazAqparat - Germanııa polıtsııasy Frankfýrt-na-Maında 54 jastaǵy Danıel M. esimdi Shveıtsarııa azamatyn ustady. Germanııa bıligi ony 2012 jyldan beri GFR aýmaǵynda tyńshylyq qyzmet atqarǵan dep esepteıdi. Bul týraly Deutsche Welle habarlaıdy.
Prokýratýra bul derekterdi 28 sáýir kúni jarııalady. 30 sáýirde istiń jaı-japsary baıandalady, dep jazdy Die Welt basylymy.
Gazettiń jazýynsha Danıel M. shveıtsarııalyq barlaý qyzmetkeri jáne ol birneshe jyldan beri Germanııada jumys istep, qarjylyq, bank sektory týraly aqparat jınaǵan. Ony GFR aýmaǵyna germanııalyq salyq organdary germanııalyq klıentter týraly derekter saqtalǵan shveıtsarııalyq bankterdiń málimetter qoryn satyp ala bastaǵanda jibergen. Osylaısha Germanııa bıligi salyqtan jaltarýshylarmen kúresti. Shveıtsarııalyq tyńshynyń mindeti málimetter qoryn satyp alýmen aınalysatyn adamdardy anyqtaý edi.
Nemis óńirlik bıligi 2006 jyly salyq tólemeýshiler týraly aqparat úshin aqsha tóleýdi bastady. Atap aıtqanda, olar shveıtsarııalyq bankterdegi nemis klıentteri týraly málimetter qoryna mıllıondaǵan eýro jumsady.
Bir jaǵynan bul úderiske nemis barlaý qyzmeti de aralasqan. Nemis salyq organdarynyń áreketinen Germanııa men Shveıtsarııa arasynda dıplomatııalyq kıkiljiń týyndaǵan, tipti shveıtsarııalyq bılik nemis salyq organdarynyń birneshe qyzmetkerin qamaýǵa alý týraly order berdi.
