Germanııada shaýrmaǵa tyıym salynbaq
ASTANA. QazAqparat - Germanııada shaýrmaǵa tyıym salý jóninde bastama kóterildi. Oǵan muzdatylǵan etke fosfattardyń qoldanylýy sebep bolyp otyr. Bul týraly The Economist habarlaıdy.
Osy másele Eýroodaq sheneýnikteriniń qaraýynda tur. Eýroparlamenttiń Densaýlyq saqtaý jónindegi komıteti Eýrokomıssııanyń shaýrma úshin muzdatylǵan etke fosfattardy paıdalanýǵa ruqsat berý týraly usynysyn qaıtardy. Qazirgi kezde jańa etke fosfatty qoldanýǵa bolady, biraq muzdatylǵan et úshin mundaı norma joq.
Fosfattardyń qoldanylýy júrek aýrýlaryna ákep soqtyrýy múmkin. Degenmen ǵalymdar bul máselede toq eterlik qorytyndyǵa kele almaı otyr. Fosfattar ádette muzdatylǵan etke onyń dámi men ylǵalyn saqtaý úshin qosylady.
Evroparlament jeltoqsanda osy máseleni qaraıdy. Eger Eýrokomıssııanyń usynysy qabyldanbasa, shaýrmaǵa tyıym salynýy múmkin.
