Germanııada saıahat kemesi apatqa ushyrady
ASTANA. QazAqparat - Germanııada saıahat kemesi kópirge soǵylyp, apatqa ushyrady. Negizgi soqqy kapıtan munarasyna tıip, tolyǵymen qıraǵan. Ekıpajdyń eki múshesi qaza tapty, dep habarlady www.24.kz.
Ereje boıynsha keme kópir astymen ótkende kapıtan munarasyn tómen túsirýi tıis. Alaıda belgisiz bir sebeppen ekıpaj osy mindetti oryndamaǵan. Apat Bavarııa jerinde bolǵan. Erlangen qalasynan Býdapeshtke baǵyt alǵan keme Reın-Maın-Dýnaı kanal boıymen júrgen. Іshinde ekıpajdyń 49 múshesi men 181 jolaýshy bar. Olardyń deni - zeınetkerler. Jergilikti polıtsııanyń habarlaýynsha, qutqarý qımyldary tórt saǵat boıy jalǵasqan.
«Keme temirjol kópirin soqqan. Oqıǵa ornyna 220 qutqarýshy men órt sóndirýshi jetti. Alaıda ekıpajdyń eki múshesin qutqara almadyq. Denelerin shyǵarý úshin órt sóndirýshiler aýyr tehnıka qoldanǵan. Qazirgi sátte 181 jolaýshy men ekıpajdyń 47 múshesi qaýipsiz jerge shyǵaryldy. Olardy qonaqúılerde jaıǵastyryp, qajetti kómegin berip jatyr. Osy kanal boıymen qozǵalys ýaqytsha toqtap qaldy», - dedi Ortalyq Frankonııa polıtsııasynyń hatshysy Mıhael Pettsold.
