Germanııada sáýir aıynda kún energııasy negizgi elektr energııa kózine aınaldy
ASTANA. KAZINFORM — 2025 jyldyń sáýirinde Germanııada kún energııasy eldiń basty elektr energııa kózine aınaldy. Bul – Eýropanyń iri ekonomıkasy úshin jańartylatyn energııaǵa kóshý jolyndaǵy tarıhı kezeń, dep jazdy Reuters agenttigi.
SolarPower Europe uıymynyń derekteri boıynsha, Germanııada sáýir aıynda shamamen 11 920 GVt·saǵ (gıgavatt-saǵat) kún elektr energııasy óndirildi, bul 2024 jyldyń sáýirimen salystyrǵanda 31%-ǵa jáne 2023 jylmen salystyrǵanda 60%-ǵa joǵary kórsetkish.
Bul ósim kún panelderin ornatý kóleminiń kúrt artýymen baılanysty. 2019 jyldan beri eldegi kún energııasy qýaty 90%-ǵa ulǵaıyp, 2024 jyly 15 GVt qosylǵannan keıin jalpy qýattylyǵy 90 GVt-qa jetti.
Sáýirde kún energııasy Germanııadaǵy jalpy elektr óndirisiniń 32%-yn qurady, al ótken jyldyń sáýirinde bul kórsetkish 23% bolǵan.
Aýa raıy men maýsymdyq erekshelikterge baılanysty kún energııasy sáýir men tamyz aılary arasynda eń joǵary kórsetkishke jetedi. Eger mamyrdan tamyzǵa deıin kún energııasy elektr óndirýde kósh bastasa, bul tarıhta alǵash ret kún energııasynyń bes aı qatarynan birinshi oryn alýy bolmaq.
Túngi ýaqytta kún energııasy qoljetimdi bolmaǵan kezde, kómir men tabıǵı gazben jumys isteıtin elektr stantsııalary óndiristi qamtamasyz etti.
Nátıjesinde:
• Kómirmen óndiriletin energııa kólemi – 44%-ǵa,
• Gazben óndiriletin energııa – 26%-ǵa ósken.
Buǵan qosa, 2025 jyldyń alǵashqy aılarynda jel energııasynyń kólemi 31%-ǵa azaıǵan edi.
Kún energııasyn tıimdi paıdalaný úshin Germanııa akkýmýlıatorlyq energııa saqtaý júıelerin belsendi túrde damytyp jatyr. Bul energııany kúndiz jınap, túnde tutynýǵa múmkindik beredi, ári kómir men gazǵa táýeldilikti tómendetedi.
Eske sala keteıik, buǵan deıin EO jel men kún energııasynyń rekordtyq kólemin óndirip jatqanyn jazǵan bolatynbyz.