Germanııada Rojdestvo qarsańynda shokolad baǵasy rekordtyq jyldamdyqpen qymbattady

ASTANA.KAZINFORM - Germanııada baǵanyń ósýine qaramastan shokoladqa suranys joǵary, dep jazady BILD.

Germanııada ınflıatsııanyń tómendeýine qaramastan, elde shokolad kámpıtteriniń baǵasy tez ósip jatyr. Zertteýge sáıkes, buǵan negizgi óndirýshi elderdegi kakao jınaý problemalary sebep bolǵan. Qurǵaqshylyq, nóser jaýyn-shashyn jáne ósimdik aýrýlary óndiris kóleminiń tómendeýine jáne shıkizat baǵasynyń ósýine ákeldi.

Tanymal shokolad fıgýralarynyń quny aıtarlyqtaı ósti. Máselen, Rausch-tyń Santa shokolady 38%-ǵa qymbattady – qazir onyń quny 9,50 eýro. Kinder Schokolade ónimderi de qymbattady – 55 gramm shokolad úshin tutynýshylar 1,69 eýro tóleıdi, bul ótken jylǵy baǵadan 20%-ǵa joǵary.

Baǵanyń ósýi 2024 jyldyń sáýirinde bir tonnasy 10 000 eýrodan asyp ketken kakao baǵasynyń rekordtyq baǵasyna baılanysty.

Baǵanyń ósýine qaramastan, shokoladqa suranys joǵary bolyp otyr. Germanııada onyń jan basyna shaqqandaǵy tutynýy 2018 jylǵy 9 kg-nan 2023 jyly 9,9 kg-ǵa deıin ósti. Ásirese shamamen 15 eýro turatyn «Dýbaı shokolady» sııaqty eksklıýzıvti ónimderge qyzyǵýshylyq erekshe.

Germanııadaǵy barlyq Volkswagen zaýyttary 2 jeltoqsannan bastap jumysyn toqtatatynyn jazǵan bolatynbyz.