Germanııada Rojdestvo qarsańynda shokolad baǵasy 20%-ǵa ósýi múmkin

ASTANA. KAZINFORM – Birneshe nemis óndirýshici shokolad baǵasynyń 20%-ǵa deıin ósetinin jarııalady, dep habarlaıdy Bild. 

Ferrero, Lindt, Mondelez jáne Ritter sııaqty brendter bıyl naryqtaǵy úlesin joǵaltty. Kásiporyndar muny baǵanyń ósýimen baılanystyryp otyr: kakao, qaptama, jalaqy, energııa – bári qymbattady. Biraq bólshek saýda ókilderi sút pen qanttyń sońǵy kezde kerisinshe arzandaǵanyn aıtyp, qarsy keldi.

Kot-d'Ivýar men Gana sııaqty óndirýshi elderde qatty jańbyr saldarynan ósimdik aýrýlary tarady, sodan keıin bastalǵan qurǵaqshylyq ónimdi joıdy. Saldarynan kakao baǵasy kúrt ósip, 2024 jyldyń jeltoqsanynda tonnasyna rekordtyq 11 957 eýroǵa jetti.

Qazirgi ýaqytta baǵa tonnasyna shamamen 5000 eýroǵa deıin tómendedi, biraq 2024 jyldyń qarasha aıymen salystyrǵanda bul áli de 30%-ǵa joǵary. Sarapshylar sýpermarketterde baǵanyń tómendeýin kútpeıdi, al Lindt jáne Mondelez sııaqty iri brendter baǵany tómendetýdiń ornyna qaptama kólemin azaıtýdy tańdap otyr.

Buǵan deıin Ábý-Dabıde eksklıýzıvti shokolad tanystyrylǵanyn jazǵan edik. Bul – byltyr Dýbaıda jasalyp, álemdik hıtke aınalǵan deserttiń úlgisimen jasalǵan jańa ónim.