Germanııada robottyń 16 jastaǵy qyzǵa tıisýine baılanysty tergeý bastaldy
ASTANA. KAZINFORM – Germanııanyń Keln qalasynda robottyń kámeletke tolmaǵan qyzǵa jynystyq sıpattaǵy áreket jasaýyna baılanysty polıtsııa tergeý júrgizip jatyr, dep habarlaıdy BILD.
Oqıǵa 11 qazanǵa qaraǵan túni qala ortalyǵyndaǵy meıramhanalardyń biriniń janynda bolǵan.
Basylym málimetinshe, boıy shamamen 1,2 metr bolatyn robot qurbylarymen birge turǵan 16 jastaǵy qyzǵa art jaǵynan jaqyndap, onyń bóksesine qol tıgizgen. Odan keıin jynystyq sıpattaǵy qımyldar jasaǵan.
Aldyn ala aqparat boıynsha, robottyń 16 jastaǵy ıesi men onyń 19 jastaǵy tanysy bolǵan jaǵdaıdy vıdeoǵa túsirip, qurylǵynyń áreketterine túsinikteme berip otyrǵan. Sonymen qatar oqıǵany áleýmettik jelide tikeleı efır arqyly kórsetken degen boljam bar.
Polıtsııa shaqyrylǵannan keıin quqyq qorǵaý qyzmetkerleri oqıǵaǵa qatysy bar adamdardy jaqyn mańnan anyqtaǵan. Al robot sol kezde avtokóliktiń júksalǵyshyna jasyrylǵan eken.
Tártip saqshylary robot pen kúdiktilerge tıesili eki uıaly telefondy tárkilegen.
Qazir tergeýshiler robottyń qalaı basqarylǵanyn jáne onyń áreketterin bireý ádeıi baǵyttaǵan-baǵyttamaǵanyn anyqtap jatyr.
Oqıǵaǵa baılanysty jynystyq sıpattaǵy tıisý deregi boıynsha tergeý bastaldy.
Aıta keteıik, Germanııada júrgizilgen saýalnamada turǵyndardyń 45 paıyzy jasandy ıntellektiniń damýy aldaǵy bes jylda ómir sapasyn nasharlatýy múmkin dep alańdaýshylyq bildirgen.
