Germanııada iri jol apatynan 26 adam zardap shekti

ASTANA. KAZINFORM – Germanııada qarsy jolaqqa shyǵyp ketken júk kóligi birneshe kólikpen soqtyǵysty. Saldarynan 26 adam zardap shekti. Bul týraly BILD basylymy jazdy. 

Kýágerlerdiń habarlaýynsha, Noıs qalasynyń mańyndaǵy avtobanda zıgzagtarmen kele jatqan júk kóligin polıtseıler toqtatýǵa tyrysqanymen esh nátıje shyqpaǵan. Sol aralyqta júrgizýshi qarsy jolaqqa shyǵyp ketip, birnishe kólikpen soqtyǵysqan. 

Jol-kólik apatynan keıin júk kóligi joldy tolyǵymen jaýyp tastaǵan. Polıtseıler júrgizýshini sol jerde qolǵa túsirdi. Ol 30 jastaǵy Polsha azamaty bolyp shyqty. 

Onyń qatty masań kúıde bolǵany jáne esirtkini qoldanǵany tekserilip jatyr. 

Apat saldarynan 50 kólikke zaqym kelip, 26 adamnyń zardap shekkeni belgili boldy. Olardyń 8-i aýyr jaraqat aldy, bir jábirlenýshiniń jaǵdaıy aýyr. 

Buǵan deıin Frantsııada qus beınesindegi temir ınstallıatsııa qulap, 13 adam zardap shekkenin habarlaǵan edik.