Germanııada poıyz baqylaýshylaryna kúsh kórsetý oqıǵalary kóbeıdi
ASTANA. KAZINFORM – Germanııada temirjol qyzmetkerlerine jasalatyn shabýyldardyń kóbeıýine baılanysty bılet tekserýshilerdiń qaýipsizdigin kúsheıtý qolǵa alyndy. Reınland-Pfalts federaldyq jerinde baqylaýshylardyń top bolyp jumys isteýine arnalǵan tájirıbelik joba iske qosyldy, dep habarlaıdy DW.
Birneshe aptadan beri óńirdegi aımaqtyq poıyzdarda ádettegi eki baqylaýshynyń ornyna keıbir reısterde 6-8 adamnan turatyn toptar jumys istep júr.
Deutsche Bahn kompanııasynyń óńirlik bólimshesiniń tóraıymy Zılke ıAnserdiń aıtýynsha, jobanyń negizgi maqsaty – temirjol qyzmetkerleri men jolaýshylardyń qaýipsizdigin qamtamasyz etý.
Ol SWR telearnasyna bergen suhbatynda sońǵy ýaqytta bılet tekserý kezinde qyzmetkerlerge til tıgizý, qorqytý jáne kúsh qoldaný oqıǵalary jıilegenin aıtty. Onyń sózinshe, adamdardyń kúsh qoldanýǵa beıimdiligi arta túsken.
Al baqylaýshylar top bolyp jumys istegen kezde mundaı janjaldar sırek kezdesedi.
– Jaǵdaı ózgerdi, janjal azaıdy. Jolaýshylar da, ádette, bizge kóbirek qurmet kórsetetin boldy, – dedi jobaǵa qatysyp júrgen qyzmetkerlerdiń biri SWR telearnasyna.
Tájirıbelik jobanyń iske qosylýyna bıyl aqpan aıynda Reınland-Pfalts óńirindegi poıyzdardyń birinde bolǵan qaıǵyly oqıǵa sebep boldy.
Sol kezde 36 jastaǵy jolserik Serkan S. bıletsiz júrgen jolaýshymen janjaldasyp qalǵan. Jolaýshy ony esinen tanǵansha uryp-soqqan. Aýyr jaraqat alǵan temirjol qyzmetkeri aýrýhanaǵa jetkizilgenimen, keıin qaıtys boldy.
Shilde aıynda Germanııanyń ońtústik-batysynda taǵy bir oqıǵa tirkeldi. Poıyzdyń qaýipsizdik qyzmetkeri jolaýshymen janjal kezinde saǵatyna 120 shaqyrym jyldamdyqpen júrip kele jatqan poıyzdan qulap ketken.
Statıstıkalyq málimetterge sáıkes, 2025 jyly Germanııada temirjol qyzmetkerlerine jasalǵan shabýyldar sany 11 paıyzǵa ósip, 2690 jaǵdaıǵa jetken.
Osyǵan baılanysty kásipodaqtar bılikten temirjol qyzmetkerlerin qorǵaý sharalaryn kúsheıtýdi talap etip otyr.
Eger Germanııa bıligi jyl sońyna deıin osy saladaǵy zańnamany qatańdatý jónindegi josparyn usynbasa, kásipodaqtar búkil el kóleminde ereýil uıymdastyrýy múmkin ekenin eskertti.
Aıta keteıik, buǵan deıin Qazaqstanda poıyz jolaýshylarynyń qaýipsizdigin qamtamasyz etý maqsatynda bıletsiz júrýge jáne qoǵamdyq tártipti buzýǵa tyıym salynatyny eskertilgen bolatyn.
