Germanııada páter tonaý oqıǵalary jıilep ketti
ASTANA. QazAqparat - Germanııada páter tonaý oqıǵalary jıilep ketti . Urylar, ásirese, eldiń Soltústik Reın-Vestfalııa, Gambýrg jáne Tómengi Saksonııa aımaqtarynda úı tintip júr, dep habarlady www.24.kz.
Berlınniń ózinde jyl basynan beri 7 myńdaı páter tonalǵan. Ótken jylǵa qaraǵanda bul 10%-ǵa kóp. Degenmen, tártip saqshylary baýkespe urylardy qalaı da tuzaqtap, qylmys sanyn azaıtamyz dep ýáde berip otyr. Sol úshin Germanııa astanasynda «Krım pro» dep atalatyn arnaıy baǵdarlama iske qosyldy. Polıtseılerdiń aıtýynsha, baǵdarlama qaı jerde urlyq-qarlyq bolatynyn anyqtaýǵa kómektesedi. Endi osy júıeni paıdalanyp, Federatıvti memlekettiń basqa da aımaqtary qylmyspen kúrespek.
«Páter tonaýshylar birneshe qylmys jasaǵan ákki qylmyskerler. Sondyqtan olar belgili bir ádispen jumys isteıdi ári bir-birine uqsaıtyn jerlerde urlyq jasaıdy. Osy rette bizdiń kompıýterlik júıemiz statıstıkany saraptap, endi qaı jerde qylmys bolýy múmkin ekenin kórsetedi. Bul shynymen de jaqsy kómekshi qural. Sonyń arqasynda oqıǵa oryn alýy múmkin jerge qyzmetkerlerimizdi jiberip, qylmystyń aldyn alamyz», - deıdi Berlın polıtsııasynyń baspasóz qyzmetiniń jetekshisi Tomas Noıendorf.
