Germanııada Palestınany qoldaǵan myńdaǵan adam narazylyqqa shyqty

Polıtsııa deregi boıynsha, Berlınniń ortasynda bolǵan aktsııaǵa 8 myń, Dıýsseldorfta 17 myń adam shyqty. Narazy top Gaza sektoryna Izraıldiń oq jaýdyrýyn toqtatýdy talap etti. Kazinform bul týraly DW basylymyna silteme jasap habarlaıdy.

Senbi, 4 qarashada Palestına týy men Palestınany jaqtap urandatqan plakat ustaǵan myńdaǵan adam Aleksanderplats alańyna jınaldy. Plakattarda “Gazadaǵy genotsıdti toqtatyńdar”, “From the river tot he sea - we demand equality" (aǵylshyn tilinen aýdarǵanda “Ózennen teńizge deıin - biz teńdikti talap etemiz”, Iordan ózeni men Jerorta teńizi aıtylyp tur) degen syndy jazýlar boldy. Narazylyqqa shyqqan top Gaza sektoryna ızraıldik shabýyldy toqtatýdy talap etti.

Polıtsııa baǵalaýynsha, jergilikti ýaqytpen 16:00 shamasynda aktsııaǵa qatysqandar sany 6 myń adam bolǵan. Polıtsııa ókiliniń sózinshe, keı qatysýshylardyń jeke derekteri tekserilgen, al bılik jarlyǵyn buzǵan plakattar boıalyp, tartyp alynǵan. Narazylyq qatań jaǵdaıda ótti.

- Izraıldiń tirshilik etý quqyn joqqa shyǵaratyn kez kelgen adam qylmys jasaǵan bolyp sanalady jáne dereý jazalanady, - dep eskertti aktsııa aldynda polıtsııa kontıngenti ókili Shtefan Katte (Stephan Katte).

Sonymen qatar, polıtsııa dereginshe, antısemıstik, antıızraıldik jáne lańkestik pen kúsh kórsetýdi nasıhattaıtyn kez kelgen pikirge tyıym salyndy.

Budan da kóp adam qatysqan aktsııa Germanııanyń batysynda, Dıýsseldorfta ótti. Polıtsııa aqparaty boıynsha, oǵan 17 myńǵa jýyq adam qatysqan. Jaqynda osyndaı aktsııa Essen qalasynda da boldy.