Germanııada ótken jazǵy Ýnıversıadany jerlesterimiz segiz medalmen aıaqtady
ASTANA. KAZINFORM — Germanııada XXXII jazǵy Ýnıversıada oıyndary óz máresine jetti. Atalǵan dúbirli dodada qazaqstandyq taekvondoshylar erekshe kózge túsken bolatyn. Bul týraly UOK málim etti.
Bul jarysta jerlesterimiz segiz medalǵa qol jetkizdi. Qurama sapynda jalǵyz altyn medaldi Samırhon Ababakırov ıelendi. Osylaısha Qazaqstan quramasy óz tarıhyndaǵy eń úzdik kórsetkishin tirkedi.
Taekvondo jarystary 17-23 shilde aralyǵynda uıymdastyryldy. Atalǵan sport túri boıynsha saıystar Germanııanyń Essen qalasynda ótti. Jalpy erler, áıelder jáne komandalyq, aralas komandalyq syndar boıynsha 24 medal jıyntyǵy sarapqa salyndy.
Qazaqstan quramasy alǵashqy kúnnen-aq sátti óner kórsetti. Nátıjesinde segiz medalǵa qol jetkizdi. Onyń bireýi altyn. Al qalǵany qola medal.
Jekeleı saıysta qola medal ıelengender: Damır Shýlenov (68 kelige deıin), Nodıra Ahmedova (49 kelige deıin), Tamırlan Tileýles (58 kelige deıin), Batyrhan Tóleýǵalı (80 kelige deıin), Beıbarys Qablan (87 keliden joǵary). Komandalyq saıysta áıelder quramasy jarystyń jartylaı fınalyna deıin jetip, qola medal enshiledi. Sonymen qatar aralas komandalar arasyndaǵy aıqasta da otandastarymyz jeńis tuǵyrynyń úshinshi satysynan kórindi.
Al quramadaǵy jalǵyz altyn medaldi 63 kelige deıingi salmaqta Samırhon Ababakırov jeńip aldy. Qazaqstandyq taekvondoshy fınalǵa deıin jetip, Túrkııa eliniń ókilin jeńdi.
Otandasymyz jarystan keıin Olympic.kz saıtyna suhbat bergen bolatyn. Ol jarysqa deıingi daıyndyǵy men aldaǵy maqsattary jaıly aıtyp berdi.
— 2024 jylǵy Olımpıadadan keıin ózimniń jeke bapkerim Nursultan Mamaevpen birge daıyndaldym. Jalpy daıyndyq jumystary jaqsy ótti. Sonymen qatar buǵan deıin jibergen qatelikterdi taldap, solarmen jumys istedik, — dedi sportshy.
Odan bólek, Samırhon Ababakırov Ýnıversıada aldyndaǵy týrnırlerge ne úshin qatyspaǵanyn aıtty.
— Ýnıversıada aldyndaǵy týrnırlerge jaraqatyma baılanysty qatysa almadym. Oqý-jattyǵý jıyndaryna da barýǵa múmkindik bolmady. Soǵan qaramastan jaraqatymdy tolyq emdep, jeke bapkerimmen josparly túrde daıyndyq júrgizdim. Qazir barlyǵy jaqsy. Kishkene em-dom sharalaryn júrgizip, ári qaraı jattyǵýǵa kirisetin bolamyn, — dep bólisti Samırhon Ababakırov.
Endigi ulttyq quramanyń basty maqsaty Qytaıda ótetin álem chempıonaty ekeni sózsiz. Osyǵan baılanysty Ýnıversıadanyń altyn júldegeri Samırhon qazirgi deńgeıi jáne aldaǵy josparlary jaıly aıtyp berdi.
— 2024 jylǵy Olımpıadamen salystyrǵanda qazir óz-ózime degen senimdiligim artty. Shynaıy sporttyq babymda kele jatyrmyn deýge tolyq negiz bar. Aldaǵy basty maqsatym — Qytaıda ótetin álem chempıonatynda top jarý. Sonymen qatar 2028 jylǵy Olımpıada oıyndarynda Qazaqstanǵa tarıhı altyn medal syılaý, — dep qorytty Samırhon Ababakırov.
Eske sala keteıik, Malaızııanyń Kýchıng qalasynda ótip jatqan taekvondodan jastar arasyndaǵy Azııa chempıonatynyń alǵashqy jarys kúninde Qazaqstan quramasynyń sportshylary jeti medal aldy.