Germanııada ortasha jalaqy ósti, biraq óńirlik aıyrmashylyq 30%-ǵa jetti

ASTANA.KAZINFORM —  2025 jyly Germanııadaǵy ortasha jyldyq jalaqy salyqqa deıin 51 272 eýro boldy, bul ótken jylmen salystyrǵanda 2,1%-ǵa joǵary, dep habarlaıdy BILD.

Zertteý barysynda shamamen 615 myń jalaqy derekteri taldanǵan. Kununu ókili Darıo Vıldıngtiń aıtýynsha, osy tizimdegi 243 334 adam ortasha kórsetkishten joǵary tabys tabady.

- Eger bul úlesti Germanııadaǵy barlyq jumyskerge qoldansaq, shamamen 18,2 mıllıon adamǵa sáıkes keledi, — dedi Vıldıng.

Degenmen, óńirler arasyndaǵy tabys aıyrmashylyǵy áli de aıqyn baıqalady.

Eń joǵary ortasha jalaqy Gessende (55 064 eýro), Gambýrgta (54 332 eýro) jáne Baden-Vıýrtembergte (53 890 eýro).

Shyǵys aımaqtarda kórsetkishter áldeqaıda tómen: Meklenbýrg-Batys Pomeranııada ortasha tabys 42 660 eýro.

Eń baı jáne eń kedeı federaldyq jerler arasyndaǵy aıyrmashylyq 29,1%-ǵa jetedi.

Qalalarda bul jaǵdaı uqsas bolyp tur: Shtýtgart alǵash ret 59 189 eýromen kóshbasshy bolyp, Frankfýrt pen Mıýnhendi ozyp ketti. Al Leıptsıg pen Drezdende ortasha jalaqy 47 myń eýrodan tómen.

Germanııadaǵy áıelderdiń tabysy áli de erlerden aıtarlyqtaı tómen: orta eseppen 47 028 eýro, al erler 53 856 eýro alady, aıyrmashylyq jylyna shamamen 6,8 myń eýro.

Basqarýshy laýazymdarda bul aıyrmashylyq odan da kóp — 10 myń eýrodan asady.

Sonymen qatar, jalaqy tájirıbe men kompanııanyń kólemine tikeleı baılanysty: on jyldan astam eńbek ótili bar qyzmetkerlerdiń tabysy jańadan kelgenderge qaraǵanda shamamen bir ese kóp, al 10 myńnan astam qyzmetkeri bar iri kompanııalarda jumys isteıtinder shaǵyn bıznestegi qyzmetkerlerge qaraǵanda 20%-ǵa joǵary jalaqy alady.

Aıta ketelik 2026 jyldan bastap Germanııada jumyssyzdarǵa arnalǵan jańa tólem júıesi kúshine enedi.