Germanııada óli tabylǵan Aıgúl Saılybaevanyń denesinen pyshaq izderi tabyldy
ASTANA. KAZINFORM – Germanııada óli tabylǵan eks-sýdıa Aıgúl Saılybaevanyń qolynan, moınynan jáne betinen pyshaq jaraqaty tabyldy, dep habarlaıdy Kazinform agenttigi BILD-ke silteme jasap.
40 jastaǵy Aıgúl Saılybaeva Sheffıldte (Anglııa) oqyp, keıin Astanada sýdıa bolyp jumys istegen. Sońǵy jyldary ol Germanııanyń batysyndaǵy Benshaım qalasynda kúıeýimen, qyzymen jáne qaıyn enesimen birge turǵan. 4 maýsym kúni tańerteń A.Saılybaeva eki jasar qyzy Jaklındi balabaqshaǵa apardy. Sodan beri ony eshkim kórmegen. Jeksenbi kúni onyń denesi qala shetindegi plastık qapshyqtan tabyldy.
BILD Telegram arnasynyń habarlaýynsha, marqumnyń qolynda, moınynda jáne betinde pyshaq jaraqattary bolǵan.
«Biz tóbeles bolǵan dep paıymdaımyz, áıelge shabýyl jasalǵan jáne ol ózin qorǵaýǵa tyrysqan», - dedi tergeýshi.
Prokýratýra BILD saýalyna bergen jaýabynda bul is boıynsha birde-bir kúdikti joq ekenin aıtqan. A.Saılybaevamen bir mezgilde Reseıden kelgen 49 jastaǵy qaıyn enesi Natalıa Dontsova joǵalyp ketti. 4 maýsymda ol nemeresin balabaqshadan úıine alyp kelgen. Sodan beri ony eshkim kórmegen. Qazir Jaklın ákesimen birge turyp jatyr. Qazaqstannan Germanııaǵa marqumnyń 35 jastaǵy inisi Qanat Saılybaev keldi. Ol ápkesin Qazaqstanda jerlegisi keletinin aıtty.
«Biz óte tyǵyz qarym-qatynasta boldyq, ýaıymdadyq. Aıgúl ádette habarlamalarǵa bes mınýtta jaýap beretin. Ata-anamyz Aıgúlmen kún saıyn habarlasyp turdy, sońǵy ret 3 maýsymda telefonmen sóılesti. 5 maýsymda biz polıtsııaǵa habarladyq. Aıgúl óte ashyq jáne janashyr adam boldy. Ol bárinen de qyzyn jaqsy kórdi jáne súıikti ana boldy. Aıgúldiń ólimine kináli adam ádil jaza alaryna jáne ádildik ornaıtynyna senemin, - deıdi Qanat Saılybaev.
Eske sala ketsek, Germanııada eks-sýdıa Aıgúl Saılybaevanyń zorlyq belgileri bar máıiti tabylǵanyn jazǵan bolatynbyz.
Syrtqy ister mınıstrliginiń resmı ókili Aıbek Smadııarov vedomstvonyń baspasóz máslıhatynda Germanııada joǵalǵan Qazaqstan azamatynyń týystary Germanııaǵa jetkenin málim etti.
Burynǵy sýdıanyń joǵalǵany týraly onyń inisi Qanat Saılybaev habarlady.
Sondaı-aq, nemis polıtsııasy QR azamatshasy Aıgúl Saılybaevanyń ólimine qatysty túsinik berdi.
