Germanııada oqys oqıǵa oryn aldy
ASTANA. 4 qyrkúıek. QazAqparat - Dıýsseldorf qalasynda jeńil atletıkadan ótip jatqan jarys kezinde sportshynyń laqtyrǵan naızasy tóreshige tıip, saldarynan 75 jastaǵy Dıter Shmıdt qaıtys boldy.
Oqys oqıǵa jyl saıyn Wilhelm Unger Games degen ataýmen ótkiziletin jastar básekesinde oryn alǵan. Bul týraly BAQ.KZ jazady.
Úlken kúshpen laqtyrylǵan sportshynyń naızasy tóreshiniń týra tamaq tusyna qadalypty. Bul sátte Shmıdt alańda ózge atlettiń laqtyrǵan naızasynyń qashyqtyǵyn ólshep júrgen eken. Sol mańdaǵy dárigerler ardager sportshynyń ómiri úshin arpalysqanymen, ony aman alyp qalý múmkin bolǵan joq. Jedel járdem qyzmetkerleri jaralyny jaqyn mańdaǵy aýrýhanaǵa alyp baryp, operatsııa da jasaǵan. Alaıda, óte kóp mólsherde qan joǵaltqandyqtan jáne uıqy kúre tamyrynyń zaqymdanýynan tóreshi aýrýhana tóseginde kóz jumdy.
Osynaý jarysqa marqumnyń 18 jasar nemeresi Fıona da qatysqan. Qaıǵyly oqıǵadan keıin uıymdastyrýshylar sporttyq sharany toqtatýǵa májbúr boldy.
Aıta keteıik, Shmıdtiń ólimine alyp kelgen naızany 15 jastaǵy atlet laqtyrǵan. Búgingi tańda jas sportshyǵa psıholog mamandardyń kómegi kórsetilip jatyr.
