Germanııada natsısterdiń kómip ketken altyny tabyldy
ASTANA. QazAqparat - Germanııada áýesqoı arheolog quny shamamen 45 myń eýro bolatyn altyn monetalar qazynasyn tapty, dep habarlady Reuters agenttigi.
Bul olja Lıýnebýrg qalasynyń mańynda tabyldy. 31 jastaǵy áýesqoı arheolog Florıan Baých temir izdeýshi jabdyqtyń kómegimen qaraǵaı túbinen 10 altyn moneta tapty. Keıin ol kásibı áriptesteriniń kómegine júgindi. Arheologtar bul jerdi qazyp, osyndaı taǵy 207 moneta tapty. Ǵalymdardyń pikirinshe, qazyna natsıstik Germanııa kezeńinde jasyrylǵan. Altyn ıesi qazynasyn Ekinshi dúnıejúzilik soǵystyń sońynda kómip ketýi múmkin.
Árbiriniń dıametri 21 mm, al salmaǵy 6 grammnan asatyn monetalar 1837-1910 jyldar aralyǵynda túrli elderde jasalǵan. Sonymen qatar bul qazynadan belgııalyq, frantsýz, ıtalıandyq jáne avstro-vengrııalyq aqsha tabyldy. Onymen qosa natsıstik belgisi bar karton qaldyǵy, "Reichsbank Berlin 244" jazýy bar mór bolǵan. Ǵalymdar bul qaptamanyń 1940-1950 jyldar aralyǵynda jasalǵanyn anyqtady.
Qazyna 19 shildede Lıýnebýrg murajaıynda jurtshylyq nazaryna usynylady.
