Germanııada myńdaǵan adam Iran halqyna qoldaý bildirip, sherýge shyqty

ASTANA.KAZINFORM — 7 qarashada Frankfýrt-na-Maın qalasynda adam quqyqtaryn qorǵaý jáne Irandaǵy demokratııalyq ózgeristerdi qoldaý maqsatynda birneshe myń adam qatysqan sherý ótti, dep habarlaıdy DW.

Germanııada myńdaǵan adam Iran halqyna qoldaý bildirip, sherýge shyqty
Kadr ız vıdeo H_@Farlouni

Polıtsııanyń málimetinshe, túske qaraı qalanyń ártúrli bóliginde shamamen 5 myń adam jınalǵan. Eń iri sherý Remerberg alańy men Ostpark saıabaǵynda ótti. Jalpy is-sharalarǵa 30 myńǵa deıin adam qatysady dep josparlanǵan.

Sherýler Germanııanyń Frıdrıh Naýman atyndaǵy qory tabystaıtyn «Bostandyq úshin» syılyǵyn berý rásimine oraı uıymdastyryldy. Bıyl bul marapat bostandyq, demokratııa jáne adam quqyqtaryn qorǵaýǵa umtylǵan Iran halqyna berildi.

Marapattaý rásimi Frankfýrttegi Áýlıe Pavel shirkeýinde ótti. Iran halqynyń atynan syılyqty 1979 jylǵy Islam revolıýtsııasy kezinde taqtan taıdyrylǵan Irannyń sońǵy shahy Muhammed Reza Pehlevıdiń uly Reza Pehlevı aldy.

Saltanatty rásimde sóz sóılegen Pehlevı bir kúni bul marapatty Tegeranda Iran halqynyń ókilderine tabystaýǵa nıetti ekenin aıtty. Sondaı-aq eldegi demokratııalyq ózgeristerdi qoldaıtynyn jetkizdi.

Alaıda marapattyń Pehlevı arqyly tabystalýy qoǵamda ártúrli pikir týǵyzdy. Synshylar onyń Iran oppozıtsııasyndaǵy barlyq saıası kúshterdiń atynan ókildik etpeıtinin aıtady. Al jaqtastary Pehlevıdi Tegerandaǵy qazirgi bılikke qarsy tanymal tulǵalardyń biri dep sanaıdy.

Sherýler kezinde qaýipsizdikti qamtamasyz etý úshin Frankfýrt polıtsııasy qosymsha kúsh jumyldyrdy. Quqyq qorǵaý organdarynyń málimetinshe, zańsyz áreketterge daıyndyq bolýy múmkin degen aqparattan keıin bir adam ustaldy.

Buǵan deıin dıplomatııalyq kelissózder aıasynda AQSh Iranǵa jańa soqqylar jasaǵany habarlanǵan edi.