Germanııada myńdaǵan adam demokratııany qoldaý aktsııasyna qatysty
ASTANA. KAZINFORM – Saksonııa-Anhalt federaldy jeri parlamentine saılaý qarsańynda Germanııanyń Magdebýrg qalasynda ótken «Demokratııa festıvaline» birneshe myń adam qatysty, dep habarlaıdy DW.
Polıtsııa málimetinshe, Magdebýrg soborynyń aldyndaǵy alańǵa shamamen 6 myń adam jınalǵan. Aktsııany «Saksonııa-Anhalt – álemge ashyq» alıansy uıymdastyrdy.
Festıval bastalar aldynda qatysýshylar Magdebýrgtiń basty temirjol vokzalynan Sobor alańyna deıin sherýmen júrdi. Uıymdastyrýshylardyń aıtýynsha, aktsııanyń maqsaty – óńirdegi demokratııany, alýan túrlilikti jáne adamdardyń bir-birine qurmetpen qatar ómir súrýin qoldaý.
Іs-sharaǵa mýzykant Sebastıan Krýmbıgel, «ıÝlı» toby, jazýshy Karolın Emke jáne klımattyq belsendi Lýıza Noıbaýer qatysty.
Jalpy, 5 qyrkúıekte Magdebýrgte segiz qoǵamdyq aktsııa ótkizý josparlanǵan. Olardyń qatarynda «Demokratııa úshin jaryqtar tizbegi» aktsııasy men «Demokradtýr» velosherýi boldy. Sonymen qatar birqatar saıası partııalardyń saılaý aldyndaǵy qorytyndy is-sharalary ótti.
Saksonııa-Anhalt jer parlamentine saılaý 6 qyrkúıekke belgilengen.
3 qyrkúıekte jarııalanǵan «Tset-De-Ef» telearnasynyń saýalnamasyna sáıkes, «Germanııa úshin balama» partııasy 41 paıyz daýys alýy múmkin. Hrıstıan-demokratııalyq odaqqa – 23 paıyz, Solshyldar partııasyna – 11,5 paıyz, Germanııanyń sotsıal-demokratııalyq partııasyna – 8,5 paıyz, «90/Jasyldar odaǵyna» 6 paıyz daýys berilýi yqtımal.
Sonymen qatar «Tset-De-Ef» telearnasy saýalnama nátıjeleri saılaýshylardyń qazirgi kezdegi kóńil kúıin kórsetetinin jáne daýys berý qorytyndysynyń boljamy bolyp tabylmaıtynyn atap ótti.
