Germanııada merez ınfektsııasyn juqtyrǵandardyń sany kúrt asty

ASTANA. KAZINFORM — 2024 jyly Germanııa Federatıvtik Respýblıkasynda jynystyq jolmen beriletin bul ınfektsııanyń 9519 jaǵdaıy tirkelgen. Bul ótken jylmen salystyrǵanda 3,9%-ǵa kóp. Mundaı derekter Robert Koh atyndaǵy ınstıtýt (RKI) málimetterinen alynǵan, dep jazdy DW. 

Juqtyrǵandardyń basym kópshiligi erler — olar er adamdarmen jynystyq qatynasqa túsetinder. Ótken jyly naýqastardyń tek 7,6%-yn áıelder quraǵan. Alaıda RKI málimetinshe, 2023 jylmen salystyrǵanda geteroseksýaldyq qatynas arqyly juqqan jaǵdaılardyń úlesi sál artqan, al er adamdar arasyndaǵy qatynas arqyly juqqan jaǵdaılardyń úlesi kerisinshe, azdap tómendegen.

Naýqastardyń ortasha jasy — 41 jas. Juqtyrý qaýpi eń joǵary iri qalalar — Berlın, Gambýrg, Keln, Frankfýrt-na-Maıne jáne Mıýnhen.

Merez juqtyrǵandardyń shamamen jartysynda aýrý belgileri baıqalady. Aýrýdyń úsh satysy bolady. Birinshi satysynda, juqqannan keıin birneshe kún nemese apta ishinde, aýyz qýysynda nemese jynys múshelerinde shaǵyn jaralar paıda bolady. Ekinshi satysynda – alaqan sııaqty deneniń ártúrli jerlerinde qyzyl bórtpe paıda bolady. Al úshinshi satysy birneshe jyldan keıin damýy múmkin jáne ol kezde qan tamyrlary men ortalyq júıke júıesi zaqymdanady.

Antıbıotıkter aýrýdyń kesh satylarynda da kómektese alady. RKI atap ótkendeı, merezge qarsy vaktsına joq, sondyqtan eń tıimdi qorǵaný quraly — barerlik kontratseptıvter, mysaly, prezervatıvter bolyp tabylady.

Aıta keteıik, Frantsııada qaýipti ınfektsııaǵa baılanysty Chavegrand irimshikteri satylymnan alyndy.