Germanııada medıtsına reformasy qyzmet sapasynyń tómendeýine ákelýi múmkin
ASTANA. KAZINFORM — Germanııa dárigerleri josparlanyp otyrǵan reforma saldarynan medıtsınalyq qyzmet sapasy nasharlap, keı bólimsheler jabylýy múmkin ekenin eskertti, dep habarlaıdy DW.
Germanııanyń Densaýlyq saqtaý mınıstri Nına Varken usynǵan memlekettik medıtsınalyq saqtandyrý júıesindegi bıýdjet tapshylyǵyn azaıtý sharalary dárigerlik tájirıbe men aýrýhanalardy qarjylandyrýdyń qysqarýyna ákelýi yqtımal.
Bul týraly aýrýhanalyq saqtandyrý dárigerleri federaldyq birlestiginiń (KBV) basshysy Andreas Gassen málimdedi. Onyń aıtýynsha, bul jaǵdaı patsıentterdiń dáriger qabyldaýyn uzaq kútýine sebep bolady.
Al Germanııa aýrýhanalar qaýymdastyǵynyń basshysy Gerald Gass medıtsınalyq mekemeler shyǵyndy bólimshelerdi jabýǵa jáne keıbir dárigerlerdi jumystan bosatýǵa májbúr bolýy múmkin ekenin aıtty. Onyń pikirinshe, usynylǵan sharalar «memleket tarapynan ruqsat etilgen aýrýhanalardy jabýǵa teń».
Nemis dermatologııalyq qoǵamy úkimetti teri qaterli isigin erte anyqtaýǵa arnalǵan tegin skrınıng baǵdarlamasyn saqtap qalýǵa shaqyrdy. Uıym ókilderiniń aıtýynsha, bul baǵdarlamany toqtatý «aýyr saldarǵa» ákelýi múmkin, óıtkeni aýrý kesh anyqtalǵan jaǵdaıda emdeý shyǵyndary áldeqaıda artady.
Buǵan deıin Nına Varken Germanııanyń densaýlyq saqtaý júıesinde qatań únemdeý sharalaryn qamtıtyn paket usynǵan bolatyn.
Atap aıtqanda, medıtsınalyq mekemelerge bólinetin qarjyny qysqartý, jumyssyz jubaılar úshin tegin medıtsınalyq saqtandyrýdy joıý jáne retsept arqyly beriletin dárilerge qosymsha tólemderdi arttyrý qarastyrylǵan.
Bul sharalar bıýdjet tapshylyǵyn jabýǵa jáne saqtandyrý jarnalarynyń odan ári ósýine jol bermeýge baǵyttalǵan.
Aıta ketelik 2045 jylǵa qaraı Germanııada halyq sany kúrt qysqarýy múmkin.
