Germanııada masa arqyly taraıtyn Sındbıs vırýsyn juqtyrǵan adam anyqtaldy
ASTANA. KAZINFORM — Germanııada Sındbıs vırýsyn el aýmaǵynda juqtyrǵan alǵashqy adam resmı túrde anyqtaldy. Bul týraly DW basylymy jazdy.
Robert Koh ınstıtýtynyń málimetinshe, vırýs juqtyrǵan adam — Baden-Vıýrtemberg jeriniń 60 jastaǵy turǵyny.
Sındbıs vırýsy negizinen qustar arasynda taralady jáne adamǵa masanyń shaǵýy arqyly juǵady. Ol Eýropanyń, Afrıkanyń, Azııanyń jáne Aýstralııanyń birqatar elderinde kezdesedi. Infektsııanyń adamnan adamǵa juǵý jaǵdaıy tirkelmegen.
Robert Koh ınstıtýtynyń baǵalaýynsha, bul jaǵdaı masalar men jabaıy qustardan vırýs anyqtalǵan aımaqtarda adamdardyń da ınfektsııa juqtyrý qaýpi bar ekenin kórsetedi.
Sındbıs qyzbasy ádette dene qyzýynyń kóterilýi, terige bórtpe shyǵýy jáne býyndardyń qatty aýyrýy sııaqty belgilermen bastalady. Aýrý ólimge ákeletin ınfektsııa qataryna jatpaıdy. Alaıda býyndardyń aýyrsynýy birneshe aptaǵa, tipti birneshe aıǵa sozylyp, adamnyń kúndelikti tirshiligine aıtarlyqtaı kedergi keltirýi múmkin.
Robert Koh ınstıtýty dárigerlerdi masalardyń belsendi kezeńinde Sındbıs vırýsyn juqtyrý yqtımaldyǵyn eskerýge shaqyrdy. Degenmen Der Spiegel basylymy keltirgen vırýsolog Ionas Shmıdt-Hanazıttiń pikirinshe, ázirge alańdaýǵa negiz joq. Germanııada mundaı jaǵdaılar óte sırek kezdesedi, al turǵyndar úshin ınfektsııa juqtyrý qaýpi tómen.
Mamannyń aıtýynsha, arnaıy qorǵaný sharalaryn qoldanýdyń qajeti joq. Masadan qorǵanýdyń ádettegi tásilderin ustaný jetkilikti. Atap aıtqanda, masaǵa qarsy repellentter paıdalaný, deneni jaýyp turatyn kıim kııý jáne turǵyn úı mańynda masalardyń kóbeıýine jol bermeý usynylady. Onyń ústine bıyl masalardyń belsendilik maýsymy aıaqtalýǵa jaqyn.
Baden-Vıýrtemberg turǵyny aýrýdyń alǵashqy belgilerin 12 shildede baıqaǵan. Ol azııalyq jolbarys masasy taralǵan aımaqta turǵandyqtan, dárigerler bastapqyda chıkýngýnıa qyzbasyna kúdik keltirgen. Keıin zerthanalyq taldaýlar tizimi keńeıtilip, qyrkúıek aıynda naýqastyń Sındbıs vırýsyn juqtyrǵany rastaldy.
Buǵan deıin Nıderlandta Batys Nil vırýsyn juqtyrǵan 28 adam anyqtalǵan bolatyn.
