Germanııada qymyz kúni atalyp ótti
Asa paıdaly sýsynmen shól basqan jergilikti turǵyndar qazaqtyń ulttyq taǵamynan da aýyz tıdi, kúmbirlegen kúı de tyńdap qaıtty. Kúmbirlegen qasıetti dombyranyń qońyr úni, ulttyq bı, oıyn osynyń barlyǵy Qazaqstandaǵydaı kórinedi. Germanııada ótken qymyz merekesine qazaq ta, nemis te, tipti Germanııany panalaǵan jandar da kelgen.
Frankfýrt turǵyny Krıstıane Elfner, men úshin tanymdy da qyzyq festıval boldy. Eýropa elinde qazaqtyń ulttyq sýsynynan aýyz tıigisi keletinder kóp, dedi.
«Munda 1997 jyly Qazaqstannan kóship kelgen edik. Osy kezge deıin shyqqan jerimizdi umytqanymyz joq. Qazaqstandy eske alǵanda baýyrlarymyzben ózara qazaqsha sóılesemiz. Etti de umytqanymyz joq. Reti kelse, et asyp jep, shúıirkelesip áńgime-dúken quramyz. Men - osy merekeniń turaqty qatysýshylarynyń birimiz. Búgin de qymyz ishý úshin 170 shaqyrymdy artqa tastap keldik», deıdi Qazaqstannan qoyns aýdarǵan Valdemar Adam.
Maındaǵy Frankfýrt qalasynyń turǵyndary jylyna eki ret qymyz kúninde osy jerge jınalady. Sýsynnyń dámi bizdikinen ózgesheleý. Arnaıy tehnologııamen daıyndalady. Germanııada eń iri jylqy fermasy osy Tsolmandarda bar. Qazaqtyń ulttyq sýsynyn 1959 jyly Tsolmannyń ákesi Rýdolf alyp kelgen.
«Jyl saıyn qojalyqta qymyz festıvalin ótkizemiz. Ári Germanııa boıynsha mundaı arnaýly merekeni biz ǵana jasaımyz. Sebebi, asa paıdaly sýsyndy eýropalyqtar da súısinip ishedi. Bir jaǵynan halyqtyń kóńil-kúıi kóterilip, janyna dárý bolatyn astan aýyz tıedi. Sondyqtan osyndaı ıgi shara uıymdastyratynymyzǵa ózimiz de qýanamyz ári maqtanamyz», deıdi sharýashylyq ıesi Gýdrýn Tsolman.