Germanııada qus tumaýy vırýsy anyqtaldy
ASTANA. 17 aqpan. QazAqparat - Germanııanyń Brandanbýrg federaldyq jerindegi Merkısh Oderland aýdanynda úırek ósiretin aýdanda qus tumaýynyń vıýrsy tirkeldi, dep habarlady Rosbalt.
Aımaqtyq qorshaǵan ortany qorǵaý, densaýlyq, tutynýshylar quqyǵyn qorǵaý mınıstrliginiń habarlaýynsha, ınfektsııanyń taralýyna jol bermeý úshin kásiporynda karantın jarııalandy. Barlyq úırek - 14 myńǵa jýyq qustyń kózi joıylatyn bolady.
Brandenbýrgte daǵdarystyq ortalyq quryldy, ol osy jer deńgeıinde epıdemııaǵa qarsy sharalardy júrgizýdi úılestirip otyrady.
Eske sala keteıik, qańtardyń sońynda Birikken Ulttar Uıymynyń aýyl sharýashylyǵy uıymy (FAO) búkil álem 2006 jylǵy alapat qus tumaýy epıdemııasynyń stsenarııi qaıtalanýy qaýpiniń aldynda turǵanyn málmdedi. FAO sarapshylary halyqaralyq deńgeıde osy jáne basqa da qaterli jan-janýarlar aýrýlaryna baqylaýdy nyǵaıtý arqyly ǵana osy stsenarııdiń jolyn kesýge bolady dep paıymdaıdy.
«Halyqaralyq ekonomıkalyq daǵdarys H5N1 qus tumaýy vırýsin jáne basqa da qaýipterdi boldyrmaýǵa baǵyttalǵan qarjylyq sharalardy qysqartýǵa ákep soqty. Bul halyqaralyq uıymdarǵa ǵana emes, elderdiń ózderine de qatysty», - dep málim etti FAO bas veterınarlyq sarapshysy Hýan Lýbrot.
Qaýipti indet 2006 jylǵydaı búkil álemge taralýy múmkin, ol kezde bul aýrý 63 eldi jaılaǵan edi. 2003 jyl men 2011 jylǵa deıingi kezeńdegi indet 400 mln. úı qustarynyń kózin joıýǵa nemese májbúrli túrde soıýǵa dýshar etti, ekonomıkalyq shyǵyn 20 mlrd.dollarǵa jetti.
H5N1vırýsy basqa da keıbir janýarlar aýrýlary sııaqty adamdarǵa tez juǵady. 2009-2011 jyldardaǵy kezeńde 500-den astam adam vırýs juqtyrdy, onyń ishinde 300 adam kóz jumdy.
