Germanııada qus tumaýynan myńnan astam tyrna qyryldy

ASTANA. KAZINFORM — Germanııanyń soltústik-shyǵysynda ornalasqan Lıným qalasynyń mańyndaǵy shalǵyndar men taıaz sýly aımaqtardan kóptegen óli tyrna tabyldy, dep habarlaıdy AZERTADJ sheteldik BAQ-qa silteme jasap.

Óte qysqa ýaqyt ishinde qus tumaýynan 1000-nan astam tyrna qyrylǵan. Arnaıy operatsııa kezinde qorǵanys kıimindegi eriktiler qustardyń ólekselerin jınap, aýmaqtan alyp ketken.

— Bizdiń oıymyzsha, bul naǵyz apat. Sebebi bul — qustardyń negizgi demalatyn oryndarynyń biri. Osy jerden úlken toptar basqa turaqtarǵa qaraı ushady. Kelesi aıaldama — on shaqyrym jerde, al odan keıingisi eki myń shaqyrym qashyqtyqta, Frantsııanyń ortalyǵynda. Sodan keıin olar Pıreneı arqyly Ispanııaǵa ótedi. Munyń bári óte qysqa merzimde oryn alady, — dedi Brandenbýrgtiń Qorshaǵan ortany qorǵaý agenttigi janyndaǵy Túrler boıynsha quzyrettilik ortalyǵynyń basshysy Norbert Shneevaıs.

Onyń aıtýynsha, basqa demalys oryndarynda da osyndaı jaǵdaı tirkelgen — tyrnalarmen qatar qazdar men qarǵalardyń da ólekseleri tabylǵan.

Mamannyń sózinshe, qazirgi ýaqytta tyrnalar men basqa da jabaıy qustar popýlıatsııasyn qorǵaýdyń birden-bir sharasy — aýyrǵan jáne óli qustar týraly dereý habarlap, olardyń ólekselerin jyldam jınaý. Bul shara aýrýdyń ári qaraı taralýynyń aldyn alý úshin qajet, sebebi indetti qarǵalar, sýquzǵyndar men túlkiler sııaqty óleksemen qorektenetin janýarlar taratýy múmkin.

Budan buryn Germanııanyń soltústiginde qus tumaýy órship bara jatqanyn jazǵanbyz.