Germanııada qus tumaýy órshise, jumyrtqa men qus eti tapshy bolýy múmkin
ASTANA. KAZINFORM – Qus sharýashylyǵy salasynyń ókilderi bılik indettiń taralýyn toqtatý sharalaryn qabyldamasa, Germanııada jumyrtqa men qus eti tapshylyǵy týyndaýy múmkin ekenin eskertti. Kúz mezgilinde bul indetten 200 myńnan astam qus qyrylǵan, dep habarlaıdy DW.
Nemis fermerleri elde qus tumaýynyń taralýy kesirinen jumyrtqa men qus eti tapshylyǵy bolýy múmkin ekenin eskertti. Frıdrıh Leffler ınstıtýtynyń málimetinshe, osy kúzde el boıynsha 200 myńnan astam taýyq, qaz, úırek jáne kúrketaýyq indetten qyrylǵan. Bul týraly 25 qazan, senbi kúni Germanııanyń Qus sharýashylyǵy ónerkásibi ortalyq odaǵy (ZDG) habarlady.
ZDG prezıdenti Hans-Peter Goldnıktiń aıtýynsha, qazirgi kezde vaktsınatsııa strategııalaryn talqylaý, EO deńgeıinde janýarlar saýlyǵyna qatysty zańnamaǵa ózgerister engizý jáne halyqaralyq saýdada ashyqtyqty qamtamasyz etý qajet. Ol basqa elder vaktsına salynǵan qustardan alynǵan ónimdi ımporttaýdan bas tartyp jatqanyn aıtty.
Goldnık defıtsıt tek qus ólimi uzaq ýaqyt joǵary deńgeıde saqtalyp, bılik indettiń taralýyn toqtata almaǵan jaǵdaıda ǵana týyndaýy múmkin ekenin atap ótti. Onyń pikirinshe, ázirge jaǵdaı tolyq baqylaýdan shyqqan joq.
Ǵalymdardyń boljamy: qustardyń qyrylýy áli de jalǵasady
Zertteýshilerdiń málimetinshe, Germanııada qus tumaýy jyl boıy tirkelip keledi, biraq kúzgi maýsymda qustardyń kóshi-qony indettiń jappaı taralýyna sebep bolady. FLI derekterine sáıkes, kúzdiń eki aıynda 200 myńnan astam úı jáne jabaıy qustar — taýyq, kúrketaýyq, qaz jáne úırek indetten qyrylǵan nemese indetti juqtyrǵan soń fermerler olardy óltirgen.
2025 jyly el boıynsha 50 qus fermasynda vırýs taralýy tirkeldi, onyń 26-sy tek qazan aıynda anyqtalǵan. Aldyn alý sharalary aıasynda 5 myńnan 93 myńǵa deıin qus joıylǵan.
Sarapshylardyń aıtýynsha, bul úrdis áli de jalǵasýy múmkin, óıtkeni maýsymdyq kóshi-qon áli aıaqtalǵan joq.
FLI mamandary epıdemııanyń kólemi 2020–2021 jylǵy qys maýsymyndaǵydaı bolýy yqtımal ekenin joqqa shyǵarmaıdy. Ol kezde Germanııada eki mıllıonnan astam qus indetten qyrylǵan.
Máseleni sheshý joldary
Baden-Vıýrtemberg jeriniń Qus ósirýshiler qaýymdastyǵynyń ókili Georg Haıtlınger barlyq aımaq úshin biryńǵaı erejeler engizip, qustardy tek jabyq qoralarda ustaýdy usyndy.
Tagesschau basylymynyń jazýynsha, bul shara tipti erkin jaıylymda júrgen qustarǵa da qatysty bolýy múmkin.
Myńdaǵan tyrna qyryldy
Bıylǵy indet ásirese tyrnalarǵa aýyr tıdi. Aldyn ala málimet boıynsha, ońtústikke qonys aýdarar kezde shamamen eki myń tyrna qyrylǵan. Sarapshylardyń aıtýynsha, dál bıylǵy jyldaǵydaı tyrnalardyń qyrylýy tirkelmegen. Onyń ústine kóshý maýsymy áli aıaqtalǵan joq, sondyqtan ólim-jitimniń artýy áli de múmkin.
Aıta ketelik Germanııanyń soltústiginde qus tumaýy órship baratyny týraly jazǵan edik.