Germanııada kitapqa baılanysty iri qarjylyq qylmys ashyldy
ASTANA.KAZINFORM - Germanııada faksımıldi alaıaqtyq isi boıynsha bes adam ustaldy. Gessen, Bavarııa, Tómengi Saksonııa jáne Baden-Vıýrtemberg óńirlerindegi 27 nysanda tintý júrgizildi, dep habarlaıdy DW.
Bul týraly Frankfýrt-na-Maınedegi prokýratýra men Gessen qylmystyq polıtsııasy habarlady.
Kúdiktiler keminde 370 adamdy, negizinen egde jastaǵylardy aldaǵan. Olar jábirlenýshilerge ózderinde óte qymbat ári baǵaly eski kitaptar bar ekenin aıtyp, oǵan iri soma tóleıtin satyp alýshylar tabylǵanyn jetkizgen. Alaıda mámile jasaý úshin aldyn ala tólem (tasymal jáne saqtandyrý shyǵyndary) aýdarý qajet ekenin alǵa tartqan. Keı jaǵdaılarda jábirlenýshilerdi nesıe alýǵa deıin májbúrlegen.
Tergeý aıasynda jalpy somasy shamamen 11 mln eýro bolatyn múlikke tyıym salyndy.
Kúdiktilerdiń birinen quny 200 myń eýrodan asatyn Mercedes-AMG kóligi tárkilendi. Sonymen qatar 50 bank shoty men Tómengi Frankonııadaǵy eki jyljymaıtyn múlikke shekteý qoıyldy.
Quqyq qorǵaý organdary toptyń basshysy 36 jastaǵy Germanııa azamaty dep otyr. Budan bólek, 31-39 jas aralyǵyndaǵy Túrkııanyń úsh azamaty ustaldy. Olar jábirlenýshilermen tikeleı baılanysqa shyǵyp, ózin kitap satýdaǵy deldal retinde tanystyrǵan. Al Frankfýrt-na-Maıne qalasynda ustalǵan 33 jastaǵy Germanııa men Erıtreıa azamaty telefon arqyly baılanys júrgizgen degen kúdikke ilindi.
Aıta ketelik Germanııa, Kanada jáne AQSh halyqaralyq hakerler jelisin joıǵan edi.