Germanııada qosalqy stantsııadan shyqqan órt jaryqtyń jappaı sónýine sebep boldy
ASTANA.KAZINFORM — Germanııanyń ońtústik-batysyndaǵy Reıtlıngen qalasynda elektr qosalqy stansasyndaǵy órtten keıin elektr jaryǵynda úlken irkilis boldy, dep habarlaıdy DW.
Germanııanyń Іshki ister mınıstri Aleksander Dobrındt órttiń shyǵýyna «joǵary yqtımaldyqpen qasaqana órt qoıý sebep bolǵanyn» málimdedi.
Onyń aıtýynsha, tergeý úshin mańyzdy izder anyqtalǵan.
— Qazir negizgi kúsh-jiger oqıǵanyń barlyq mán-jaıyn anyqtap, qylmyskerlerdi tabý úshin jan-jaqty tergeý júrgizýge baǵyttalǵan, — dedi mınıstr.
Baden-Vıýrtemberg federaldyq jeriniń Іshki ister mınıstri Manýel Hagel bul iske qatysty «qasaqana órt qoıý jáne qoǵamdyq mekemelerdiń jumysyna kedergi keltirý» kúdigi bar ekenin aıtty. Onyń sózinshe, tergeýmen memlekettik qaýipsizdik polıtsııasynyń arnaıy bólimshesi jáne jergilikti qylmystyq ister jónindegi basqarmanyń terrorızmge qarsy ortalyǵy aınalysyp jatyr.
— Kináliler zań talaptaryna sáıkes qatań jaýapqa tartylady, — dedi mınıstr Roıtlıngen qalasynda.
Tergeýshiler órttiń shynymen qasaqana qoıylǵanyn nemese tipti terrorıstik áreket bolǵan-bolmaǵanyn anyqtap jatyr. Alaıda oqıǵaǵa túpkilikti baǵa berýge áli erte ekenin, tergeý barlyq baǵyt boıynsha jalǵasyp jatqanyn atap ótti.
Óz kezeginde Shtýtgarttaǵy qylmystyq polıtsııa basqarmasynyń ókili órt qoıý kezinde janǵysh zat qoldanylǵan bolýy múmkin ekenin habarlady.
Roıtlıngendegi órt elektr qýatynyń jappaı óshýine sebep boldy
8 maýsymǵa qaraǵan túni Shtýtgarttyń ońtústigindegi Roıtlıngen qalasynda elektr qosalqy stantsııasyndaǵy eki transformator órtendi. Jarty saǵattan keıin órt oqshaýlanyp, sol túni tolyq sóndirildi.
Alaıda saldarynan elektr jelilerinde aýqymdy aqaý týyndady. Eń qıyn kezeńde qalanyń ózinde jáne oǵan jaqyn eldi mekenderde shamamen 20 myń úı jaryqsyz qaldy. Manýel Hageldiń málimetinshe, elektr qýatynyń úzilýi 7 600 ǵımaratty qamtyp, shamamen 40 myń adamǵa áser etken.
Roıtlıngen meri Tomas Kektiń aıtýynsha, jaryqtyń óshýi qalalyq aýrýhana jumysyna da áser etken. Onyń sózinshe, bul adamdardyń ómirine qaýip tóndirgen jáne «muny aqtaýǵa bolmaıdy».
Kún ishinde keıbir aýdandarda elektr qýaty qaıta qosyldy. Hageldiń aıtýynsha, polıtsııa mańyzdy ınfraqurylym nysandarynyń mańyndaǵy baqylaýdy kúsheıtedi. Sondaı-aq túngi ýaqytta jaryqsyz qalǵan aýdandarda qosymsha patrýlder jumys isteıdi.
Buǵan deıin Germanııada áleýmettik jelide kantslerdi balaǵattaǵandarǵa aıyppul salyna bastaǵany týraly jazdyq.
