Germanııada koronavırýstan ólim-jitim kúrt artty
NUR-SULTAN. QazAqparat - Germanııada pandemııa bastalǵaly jańa antırekord tirkeldi: bir táýlikte 1 244 adam koronavırýstan qaıtys boldy. QazAqparat álemdegi epıdemıologııalyq ahýal jóninde koronavırýstyń taralýyna jol bermeý jónindegi QR Úkimeti janyndaǵy vedomstvoaralyq komıssııanyń aqparatyna silteme jasap habarlaıdy.
Germanııa medıtsına mamandarynyń paıymynsha, koronavırýs boıynsha ahýaldyń aldaǵy jaqyn ýaqytta jaqsarýyn kútýdiń qajeti joq. Elde qańtar aıynyń sońyna deıin qatań karantın engizilgen. Biraq el bıligi «mega-lokdaýn» engizýdi de qarastyrýda. Ol jaǵdaıda qoǵamdyq kólik tolyq toqtaıtyn bolady.
Frantsııada qoǵamdyq kólikter jumys isteıdi jáne dúkender de ashyldy, biraq komendanttyq saǵat kúsheıtildi: endi keshki saǵat 6-dan keıin sebepsiz kóshege shyǵýǵa bolmaıdy (buǵan deıin tyıym 20:00-den bastalǵan bolatyn).
Ispanııada 100 myń turǵynǵa shaqqanda koronavırýsty juqtyrý kórsetkishi qaıtadan 500 adamnan asyp ketti. Andalýsııa, Mýrsııa, Kastılııa-Leon avtonomdy qaýymdastyqtarynyń basshylary óz aımaqtarynda úıde oqshaýlaý rejımin engizý úshin el úkimetinen quqyq pen múmkindik berýdi surap otyr.
Dúnıejúzilik densaýlyq saqtaý uıymynyń halyqaralyq sarapshylar toby Qytaıdyń Ýhan qalasyna koronavırýstyń shyǵý sebebin zertteý úshin keldi. Jumysqa kirispes buryn 10 sarapshy eki aptalyq karantınnen ótýleri kerek. Birneshe aı boıy bolǵan turaqtylyqtan keıin, sońǵy aptada Qytaıda koronavırýs ınfektsııasynyń táýliktik tirkelgen sany kúrt ósti. Olardyń kópshiligi tótenshe jaǵdaı jarııalanǵan Hebeı provıntsııasynda anyqtalǵan.
